Нэрт эрдэмтэн Альберт Эйнштейн өөрийн нэрийн хуудас болсон E=mc2 буюу харьцангуйн тэгшитгэлээ гараар бичсэн ил захидлыг АНУ-ын Бостон хотноо дуудлага худалдаанд оролцуулсан байна. Энэ нь улмаар нийт 1.2 сая ам.долларт хүрч зарагдсан нь зохион байгуулагчдын тооцоолж байснаас гурав дахин өндөр үнэ байсан тухай мэдэгджээ. Калифорнийн Технологийн институт болон Иерусалим хотын их сургуулийн эрдэмтдийн мэдээлж буйгаар Эйнштейн алдарт харьцангуйн онолын тэгшитгэлээ өөрийн гараар бичсэн ердөө дөрвөн бичиг баримт байдаг бөгөөд үүнээс цор ганц нь хувийн цуглуулгад багтдаг аж. Харин бусад нь холбогдох архив, баримт бичгийн газруудад хадгалагддаг юм. Эйнштейний нээсэн харьцангуйн тэгшитгэл нь физикийн шинжлэх ухаанд ихээхэн чухал үүрэг гүйцэтгэдэг бөгөөд цаг хугацаа гэдэг ухагдахуун туйлын биш болохыг баталсан билээ. Тэрбээр энэхүү захиаг 1946 оны аравдугаар сарын 26-ны өдөр польш гаралтай Америкийн физикч Лудвик Силберштейнд зориулан илгээж байжээ.
Эх сурвалж: "Монголын үнэн" сонин
