Тагнуулын ерөнхий газрын ажилтнууд бусадтай бүлэглэн ОХУ-ын иргэн Г, Монгол Улсын иргэн М нарыг дээрэмдсэн хэрэг 2020 оны 1 дүгээр сард гарч байв.
Тэгвэл уг хэрэгтнүүдэд холбогдох давж заалдах шатны шүүх хурал өнгөрсөн долоо хоногт болжээ. Анхан шатны шүүхээс хэрэгнтүүдэд 3-5 жилийн хорих ял оноосон байдаг. Давж заалдах шатанд эхний шийдвэрийг хэвээр үлдээжээ.
Хэргийг сануулбал, Эрүүгийн цагдаагийн газарт нэгэн иргэн “ОХУ-ын иргэнийг манай улсын иргэд дээрэмдэж, их хэмжээний мөнгийг нь аваад явчихлаа” гэх утга бүхий тайлбартай дуудлага өгсөн байна. Үүний дагуу цагдаа нар дээрэмдүүлсэн иргэдээс мэдүүлэг авах, хаана, юу хийж явах үед нь ямар хүмүүс дээрэмдсэн гэдгийг шалган тогтоох ажиллагааг шуурхай эхлүүлжээ. ОХУ-ын иргэн Г тухайн үед онц их хэмжээний мөнгө буюу 50 мянган ам. доллар, 2500 евротой байсан байна.
Тэрбээр цагдаа нарт “Гэнэтхэн буутай, баг өмссөн, энгийн хувцастай дөрвөн залуу ороод ирсэн. Тэд гар хөлөнд нь өчиг хийж, буу тулган айлган сүрдүүлсэн. Бизнес хийхээр хадгалж байсан бүх мөнгийг минь дээрэмдчихлээ. Намайг их хэмжээний ам. доллар бэлэн аваад явж байгааг цөөхөн хүн мэднэ. Би барагтай хүнд өчүүлээд ойчихгүй. Тусгай арга техник эзэмшсэн хүмүүс намайг дээрэмдсэн” гэх утга бүхий мэдүүлэг өгсөн байна. Ингээд цагдаа нар гэмт хэрэгтнүүдийг шуурхай илрүүлэх тусгай ажиллагааг эхлүүлжээ. Хэргийн газарт үзлэг хийсэн шинжээч нар гэмт хэрэгтнүүд огт ул мөр үлдээгээгүй, ойр орчмын хяналтын камер зэрэг ажиллагаагүй болсон зэргийг ажлын хэсгийнхэнд мэдэгдсэн байна. Цагдаа нар дээрэмчид наймуулаа байсан гэдгийг мэдээллийн мөрөөр тогтоожээ. Өргөн цар хүрээтэй ажиллагаа явуулсны үр дүнд сэжигтэй автомашиныг илрүүлснээр хэргийн зангилаа тайлагдаж, дээрмийг Тагнуулын ерөнхий газрын тусгай албанд ажилладаг, 1984-1992 онд төрсөн Н, Д, Л, Б нар хийсэн болохыг илрүүлсэн байна.
Эх сурвалж: shuurhai.mn
