Ерөнхийлөгч Х.Баттулга албан тушаалаасаа буухын урд өдөр ЗАРЛИГ гаргасан нэр бүхий 13 хүнд уучлал үзүүлсэн нь анхаарал татаад байна. Одоогоор 5 хүний нэр оолонд ил болоод байгаа бол үлдсэн хүмүүс нь хэн байгаа талаар нууцлалтай байна. Учир нь энэ талаарх мэдээлэл ихээхэн нууцлалтай байгаа гэгдэж байна.
Тэгвэл хэн хэн өршөөгдсөнийг танилцуулъя.
ЭРҮҮ ШҮҮЛТИЙН ХЭРГЭЭР 1.5 ЖИЛ АВСАН ГЕНЕРАЛ Б.ХУРЦ
Улс төрийн нэрт зүтгэлтэн С.Зориг агсны амь насыг хөнөөсөн хэрэгт 3 шатны шүүхээс ял сонссон Б.Содномдаржаа, Т.Чимгээ нар эдүгээ суллагдаад байгаа. Тэднийг шалгах явцад тагнуул, прокурорын эрх бүхий албан тушаалтнууд хууль зөрчиж эрүүдэн шүүсэн гэх баримт ил болсноор хэрэг задарч тухайн үед ТЕГ-ыг удирдаж байсан Б.Хурц нарын 9 хүн буруудан шүүгдсэн юм.
Хоёр жил орчим үргэлжилсэн эрүү шүүлтийн гэх хэргийн шүүх хурал өнгөрсөн 4 дүгээр сард болж анхан шатны шүүх Б.Хурц нарт 1-3 жилийн ял оноосон юм. Тодруулбал, Б.Хурц 1 жил 6 сар хоригдох ял сонссон. Харин түүнд Ерөнхийлөгч асан Х.Баттулга уучлал үзүүлжээ.
ЖДҮХС-ААС 1.2 АВСАН ХЭРГЭЭР 3.5 ЖИЛ СОНССОН Д.ДАМБА-ОЧИР
УИХ-ын гишүүн асан Д.Дамба-Очирыг Жижиг, дунд үйлдвэрлэлийг хөгжүүлэх сан /ЖДҮХС/-гаас “Сапфир стоун” ХХК-д 1.2 тэрбум төгрөгийн зээл авахад нь нөлөөлсөн үндэслэлээр буруутгаж, Авлигатай тэмцэх газраас шалгаж байсан юм. Шүүх хуралдаан 2020 оны 08 дугаар сарын 19-ний өдөр болж түүнд 3 жил 6 сар хоригдох ялыг оноосон юм.
МАНСУУРУУЛАХ БОДИС ТЭЭВЭРЛЭЖ 8 ЖИЛ СОНССОН "ШАР ЭНХЭЭ" БУЮУ Э.ЭНХБАТ
“Шар Энхээ” гэх нэрээр олонд танигдсан Э.Энхбатын Хан-Уул дүүргийн нутагт байх “Ривер гарден” хотхон дахь гэрт нь Э.Насанжаргал, Б.Цолмон, Б.Чинзориг нар 2019 оны тавдугаар сард өмнөд хөршөөс оруулж ирсэн мансууруулах бодисоо хүргэн өгч байхдаа үйлдэл дээрээ баригдсан гэх мэдээлэл бий. Түүгээр ч зогсохгүй тэднийг баривчлах үед тэд эсэргүүцэж, автомашинаараа цагдаагийн ажилтныг мөргөн зугтаасан гэдэг. Иймд Хан-Уул дүүргийн Эрүүгийн хэргийн анхан шатны шүүх Э.Энхбатад найм, хилээр мансууруулах бодис оруулж ирсэн, цагдаагийн ажилтныг эсэргүүцсэн Э.Насанжаргал, Б.Цолмон нарт долоо, шүүгдэгч Б.Чинзоригт дөрвөн жил хорих ял оноосон гэх мэдээлэл бий.
Тэгвэл Ерөнхийлөгч асан Х.Баттулга түүнд уучлал үзүүлэхдээ Э.Энхбатын ялаас 2.5 жилийг хассан мэдээлэл байна.
ГАЗРЫНХАА ДАРГЫНХАА АМИЙГ ХӨНӨӨСӨН ХЭРЭГТ 13 ЖИЛ СОНССОН Б.МАХБАЛ
ЗТХЯ-ны газрын дарга нар нэгнийхээ аминд хүрсэн ноцтой хэрэг 2018 онд гарч байв. Уг хэргийн буруутан Б.Махбал хэмээх эр байсан бөгөөд түүнд холбогдох шүүх хурал хэдэнтээ хойшилсоор хэрэг гарснаас 2 жилийн дараа 13 жилийн хорих ял оноосон юм.
Тэгвэл түүнд Ерөнхийлөгч уучлал үзүүлэн хорих ялаас нь 2 жилийг хасчээ.
Харин талийгаач Г-гийн дүү цахим хуудаст "Энэ алуурчин ахыг минь алсан. Төмөр замын зарцуулалтад хөндлөнгийн аудит оруулна гэснийх нь төлөө зодоод алчихсан. Ингээд Баттулгын зарлигаар өршөөгдөөд гараад ирдэг гэнэ ээ. Одоо ер нь яах ёстой юм бэ. Тэвчээр тасарч байна" гэсэн байна.
ЗАМ ТЭЭВРИЙН ОСЛООР 2 ХҮНИЙ АМИНД ХҮРЧ 3 ЖИЛ 3 САРЫН ЯЛ АВСАН ЗОХИОЛЧ Д.ГАЛСАНСҮХ
Зохиолч, яруу найрагч Д.Галсансүхэд холбогдох эрүүгийн хэргийг Хан-Уул дүүргийн эрүүгийн хэргийн анхан шатны шүүх 2021 оны хоёрдугаар сарын 8-ны өдөр хянан хэлэлцсэн байдаг. Тэрээр зам тээврийн ноцтой осол гаргаж, автомашинд нь зорчиж явсан хэвлэл мэдээллийн 2 ажилтан амиа алдсан юм.
Шүүхээс шүүгдэгч Харгана овогт Дэжидмаагийн Галсансүхийг Эрүүгийн хуулийн тусгай ангийн 27.10 дугаар зүйлийн 4 дэх хэсгийн 4.2 заалтад зааснаар “Авто тээврийн хэрэгслийн жолооч хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний акт”-ыг зөрчсөний улмаас нэг хүний эрүүл мэндэд хөнгөн, хоёр хүний амь насыг хохироосон гэмт хэрэг үйлдсэн гэм буруутайд тооцож, тээврийн хэрэгсэл жолоодох эрхийг 6 жилийн хугацаагаар хасаж, 3 жил 3 сарын хорих ял оноосон юм.
Одоогоор ил болоод байгаа 5 хүний 2 нь хүн амины хэрэгтэн бол үлдсэн нь албан тушаал, мансууруулах бодистой холбоотой ноцтой хэргүүдэд холбогдсон этгээдүүд ийнхүү өршөөгджээ. Тэднийг чухам ямар үндэслэлээр уучилсан талаар ч тодорхой мэдээлэл олон нийтэд ил болоогүй байна.
Эх сурвалж: shuurhai.mn Г.ОЧИР
