Японы хүүхдийг ивээх сангаас манай улсын салбар салбарын төлөөлөл орсон  хамтарсан баг бүрдүүлж 3 жилийн хугацаанд хүүхдийн хүчирхийллийг бууруулах төсөл хэрэгжүүлсэн байна. Төслийн хүрээнд хүчирхийлэлд өртөх эрсдэлтэй 176 тохиолдлыг илрүүлж, 204 хүүхэд, гэр бүлд хүчирхийллээс хамгааллын зөвлөгөө өгч ажиллажээ.

Жишээлбэл нийслэлийн нэгэн дүүргийн дугаар хорооны иргэн иргэн Т архи ууж согтуурсан үедээ хүүхдээ зодож, дэлгүүр рүү явж архи олж ирэхийг шаардаж байгааг төслийн хамтарсан баг илрүүлж шаардлагатай арга хэмжээ авсан байна. Энэ бол хүчирхийлэл үйлдэж байсныг таслан зогсоосон 176 тохиолдлын зөвхөн нэг нь. Дээр дурьдсан тохиолдол бол нийтлэг болдог үзэгдлийн нэг жишээ юм. Хүчирхийлэлд өртсөн хүүхэд асуудлаа хэн нэгэнд ярьж зүрхэлдэггүй.Хэнд ч хэлж чадахгүй үгээ хамгийн түрүүнд баг хорооныхоо нийгмийн ажилтанд учирладаг байна.

Хүчирхийлэл үйлдэж байгаа гэр бүлийн гишүүний үйлдэлийг таслан зогсооход хүчний байгууллагын тусламжийг авах шаардлагатай болдог.Хүчирхийлэл үйлдэгчдийг цагдан хорих, саатуулах арга хэмжээ авдаг байсан бол төслийн хүрээнд сэтгэл санааны байдлыг шинжлэх, сэтгэлзүйчтэй ярилцуулах зэрэг арга хэмжээ авсан байна.Энэ нь хүчирхийлэгч этгээд дахин хүчирхийлэл үйлдэхгүй болтлоо ухамсарлаж ухаарах ач холбогдолтой болсныг хамтарсан төслийн хэв журам сахиулагч онцолж байна. 

Хүүхдийн хүчирхийллийг бууруулахын тулд яах ёстой вэ гэдэг асуудлыг олон байгууллага ярьж тодорхой арга хэмжээ авдаг ч хүчирхийллийн гаралт буурахгүй байгаа нь өдөр бүр гарах хүчирхийллийн хэргээс харж болно. Манай улс бодлогын хэмжээнд хүчирхийлэлтэй хэрхэн тэмцэж, таслан зогсоох ажил хийгдэж байгааг тодрууллаа.

Хүүхдийг хүчирхийллээс хамгаалахын тулд өнгөрсөн онд түр хамгаалах байрыг ашиглалтанд оруулсан байна. Тус байраар өнгөрсөн онд гэхэд 223 хүүхэд хандаж тусламж үйлчилгээ авсан. Харин он гарсаар 323 хүүхэд ханджээ. Тус байранд ирсэн хүүхдүүдэд 2-3 сар хамгааллын үйлчилгээ үзүүлж, эцэг эх, цагдаа нийгмийн ажилтан зэрэгтэй харилцан зөвшилцсний үндсэн дээр гэрт нь хүргэдэг байна. Мөн хүүхэд хамгаалах үйлчилгээний хөлс жилийн төсөв нь 300 орчим сая байсныг 2018 оны төсөвт 3 тэрбум гаруй төгрөг болгон нэмэгдүүлсэн байна. хүүхдийг хамгаалах үйлчилгээг цогцоор нь авч хэрэгжүүлснээр хүчирхийллийг бууруулна гэж японы хүүхдийг ивээх сангаас зөвлөж байна.

Эцэст нь хүүхдийг хүчирхийллээс хамгаалах асуудал бол дан ганц хүүхдийн байгууллагын хийх ажил биш юм. Хороо дүүргийн, сургуулийн нийгмийн ажилтан өрхийн эмч, сэтгэлзүйч цагдаа хүчирхийллийн эсрэг төв, төрийн бодлого цогцоороо хамтарсан үйл ажиллагаа явуулсны үндсэн дээр хүчирхийллийг арилгана гэдгийг албаныхан онцоллоо.

                                                                                                                  Эх сурвалж Шуурхай.мн