Орос, Украины төлөөлөгчид хэсэг завсарласны эцэст Туркийн Стамбул хотод биечлэн уулзлаа. Энэ уулзалтын дараа Оросын Батлан хамгаалах яамны төлөөлөгч мэдэгдэл хийн, Украины хойд хэсэг дэх байлдааны үйл ажиллагаагаа "хэд дахин" бууруулна хэмээн зарласан байна.
Уулзалтын дараа Оросын төлөөлөгчдийн тэргүүн Владимир Мединский "цогц хэлэлцээ боллоо" хэмээн мэдэгдсэн байна. Гэрээнд оруулах байр сууриа Украин илэрхийлсэн гэдгийг нэмж өгүүлжээ.
"Эдгээр саналуудыг ойрын үед авч хэлэлцэн, ерөнхийлөгчид мэдэгдээд, бид зохих хариугаа өгнө" хэмээн Мединский мэдэгдсэн байна.
Украины тавьсан саналууд
Энх тайван тогтоохоос өмнө Украин улс олон нийтийн санал асуулга явуулж, энэ санал асуулгаар иргэд гэрээний санал болгосон хувилбарыг дэмжих, эсвэл эсэргүүцэх санал өгнө гэж Украины талын төлөөлөгч Александр Чалый ВВС агентлагт мэдээлжээ.
Түүний өгүүлснээр, гал бүрэн зогссоны дараа л гэрээнд гарын үсэг зурах бөгөөд үүний дараа гэрээг Украины парламент болон баталгаа гаргах орнуудын парламент соёрхон батлах юм байна.
Энэ удаагийн хэлэлцээгээр талууд Крым, Донбассын асуудлыг тусад нь хэлэлцэхээр тохиролцжээ. Хэлэлцээгээр Украины талын тавьсан саналыг хүргэвэл:
- -Крым, Севастополийн статусын талаарх хэлэлцээг 15 жилийн хугацаанд хийнэ, энэ хугацаанд талууд асуудлыг зэвсгийн аргаар шийдвэрлэхээс татгалзана.
- "Бүгд найрамдах ард улс"-уудын хяналтад орсон бүс нутгуудын статус болон хувюь заяаг тусгай заалтад оруулсан, үүнийг хоёр талын ерөнхийлөгч биечлэн уулзаж шийдвэрлэнэ.
- Хэд хэдэн орноос аюулгүйн баталгаа гаргаж өгсөн тохиолдолд Украин аливаа эвсэлд орохгүй байхыг зөвшөөрөхөд бэлэн. Үүнийг баримт бичгээр баталгаажуулах ёстой.
- Дээрх нөхцөлөөр тохиролцоонд хүрхсэн тохиолдолд Украины нутаг дэвсгэр дээр гадаадын цэргийн бааз, цэрэг байршуулахгүй.
- Украин улс аливаа цэрэг улс төрийн холбоонд элсэхгүй. Гагцхүү баталгаа гаргаж буй улс орнууд зөвшөөрсөн тохиолдолд Украины нутаг дэвсгэр дээр олно улсын цэргийн сургуулилалт явагдаж болно.
Украины тал "баталгаа гаргах орон"-той байхыг шаардаж байгаа бөгөөд ийм орнуудаар Их Британи, Хятад, АНУ, Турк, Франц, Канад, Итали, Польш, Израиль улс байх боломжтой гэж Украины тал үзэж байгаа аж. Эдгээр орнуудын зарим нь урьдчилсан байдлаар зөвшөөрчээ.
Ийнхүү баталгаа гаргагч орнуудтай болсон тохиолдолд Украины эсрэг дайн эсвэл аливаа төрлийн зэвсэгт түрэмгийлэл гарвал баталгаа гаргагч орнууд гурван өдрийн дотор зөвлөлдөж, дараа нь Украинд тусламж олгох аж. Энэ саналыг Оросын талд тавьсан, хариугаа хүлээж байгаа гэж Украины талын хэлэлцэгч Давид Арахамия мэдэгджээ.
Харин ОХУ-ын төлөөлөгчдийн тэргүүн Мединский Украины тавьсан саналыг тохиролцоонд хүрэх цогц алхам хэмээн нэрлээд, Орос улс саналуудыг хэлэлцээл зохих хариуг өгнө хэмээн мэдэгдсэн байна.
Эх сурвалж: Shuud.mn
