Дорнод Украины Бахмут хотын төлөөх тулалдаанд сүүлийн таван сарын хугацаанд Оросын 20,000 гаруй цэрэг амь үрэгдсэн тухай АНУ-ын албаны эх сурвалж өчигдөр мэдээлжээ. Үүний тал орчим нь хувийн зэвсэгт хүчний Вагнер компанийн хөлсний цэргүүд гэнэ.

Бахмутын тулаанд бас Оросын 80,000 орчим цэрэг шархадсан гэж тооцоолж байгаагаа Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби тагнуулын байгууллагын дүгнэлт дээр үндэслэн мэдээлсэн байна.

Бахмут хотод дайнаас өмнө 70,000 орчим хүн оршин сууж байсан гэдэг. Тэгвэл Оросын талын хохирлын нийт хэмжээ энэ тооноос давж байна.

Одоо тус хотод цөөн мянган энгийн иргэн үлдсэн гэдэг. Бахмут хотыг эзлэх тулаан өнгөрсөн оны зунаас хойш үргэлжилж байгаа.

“Бахмутаар дамжуулан Донбасыг бүхэлд нь хяналтдаа авах Оросын оролдлого бүтэлгүйтсэн гэж бид үзэж байна. Оросын тал өнгөрсөн хугацаанд бодитой стратегийн ач холбогдолтой ямар ч газар нутгийг булаан авч чадсангүй. Бид Оросын талын нийт хүн хүчний хохирлыг 100,000 гаруй, үүнээс 20,000 гаруй нь байлдааны ажиллагааны үеэр амь үрэгдсэн гэж үзэж байна” гэж Жон Кирби өчигдөр Цагаан ордонд сэтгүүлчидтэй уулзахдаа мэдээлжээ.

Өнгөрсөн оны арванхоёрдугаар сарын эхнээс хойших тоо баримтыг тэр ийнхүү дурдсан байна.

Мэргэжилтнүүд Бахмут хотын стратегийн ач холбогдол бага гэж үздэг. Украины тал Бахмутыг хамгаалах тулаанд дайсны талаас аль болох их хохирол учруулах чухал гэж үзэж байгаагаа өмнө нь мэдэгдэж байсан.

Харин Оросын армийн удирдлагуудын хувьд ямар нэг ялалт байгуулж, Кремльд сайн мэдээ дуулгах нь нэн чухал болсон гэж ажиглагчид үзэж байна.

Бахмутын төлөө тулаанд Оросын талаас Вагнер групп гол үүрэгтэй оролцож байгаа.

Гэхдээ тус байгууллагын тэргүүн Евгений Пригожин өнгөрсөн долоо хоногийн сүүлээр өгсөн ярилцлагадаа Оросын албан ёсны арми дэмжлэг үзүүлэхгүй бол Бахмутаас ухрахаа мэдэгдсэн юм.

Тэрбээр Украины армийн удахгүй эхлүүлэхээр бэлдэж буй сөрөг довтолгооны өмнө Оросын ард түмэнд худал мэдээлэл түгээхгүй байхыг ОХУ-ын батлан хамгаалах яамны удирдлагуудад анхааруулж байв.

“Бид Оросын ард түмэнд худлаа ярихаа зогсоож, бүх үнэнийг хэлэх хэрэгтэй” гэж Пригожин энэ үеэр хэлсэн юм.

Хэдийгээр Вагнер групп их хохирол амссан ч ар араас нь шинэ анги нэгтгэлүүдийг нэмж тулаанд оруулсаар байгаа тул байлдааны ажиллагаа маш хүнд нөхцөлд үргэлжилж буйг Украины хуурай замын зэвсэгт хүчний командлагч, генерал Олександр Сирський өчигдөр мэдээлжээ.

“Гэхдээ дайснууд хотыг бүхэлд нь хяналтдаа авч чадахгүй” гэж тэр энэ үеэр хэлсэн байна.

Эх сурвалж: BBC