Нью-Йоркийн барималч, перформанс артист Маурицио Кателланы “Comedian” нэртэй инсталляцын бүтээл нь гадил жимсийг туузан наалтаар хананд тогтоосон байдаг.

Түүний уг бүтээлийг одоо Өмнөд Солонгосын нийслэл Сөүл хотын урлагийн галерейд байрлуулан нийтэд үзүүлж байгаа юм.

Тэгвэл үзэгчдийн дундаас нэг оюутан уг бүтээлд ашигласан гадил жимсийг салгаж идсэн тухай хэвлэлүүд мэдээлжээ.

Сөүлийн Үндэсний Их сургуулийн оюутан Но Хюн Сүгийн энэ үйлдлийг найзууд нь гар утсандаа бичиж баримтжуулсан байна.

Дараа нь тэр гадил жимсний хальсыг буцааж хананд нааж тогтоожээ.

Галерейн захиргаа уран бүтээлийг сүйтгэсэн талаар гомдол гаргахгүйгээ мэдэгдсэн байна. Кателланы бүтээлийн гадил жимсийг 2-3 цаг тутамд шинээр сольдог ажээ.

Оюутан залуу өглөөний цайгаа уугаагүй өлссөн байснаас ийм үйлдэл гаргаснаа сүүлд ярьсан байна.

Дараа нь Но телевизээр ярихдаа “Урлагийн бүтээлийг гэмтээх нь бас урлагийн бүтээлд тооцогдоно” гэж өөрийнхөө үйлдлийг зөвтгөжээ.

Болсон явдлын талаар сонссон Кателлан инээмсэглээд “Ямар ч асуудалгүй” гэж хэлсэн байна.

“Comedian” нэртэй уг бүтээлээ тэр 2019 онд Майами хотын үзэсгэлэнд анх удаа үзүүлж, $120,000-аар зарж байжээ. Хоёр дахь үзүүлбэрийг нь бас нэг хүн $150,000-аар авсан байна.

Энэ үеэр өөр нэг уран бүтээлч Дэвид Датуна мөн гадил жимсийг нь бүтээлээс салгаж аваад идэж байсан юм.

20 центийн үнэтэй жимсийг их хэмжээний мөнгө болгож чадсан Кателланыг тэр “суут ухаантан” гэж нэрлээд “Би сүүлийн гурван жил дэлхийн 67 орноор аялж, хүмүүс хэрхэн амьдарч байгааг харлаа. Сая сая хүн өлсөж үхэж байна. Гэтэл тэр хэдхэн гадил хананд тогтоогоод бараг хагас саяыг олчихлоо шүү дээ” хэмээн шүүмжилж байжээ.

Италийн Падова хотод төрсөн Кателлан уламжлалыг эвдсэн этгээд хачин бүтээл туурвидгаараа алдартай нэгэн юм.

Тэрбээр нэг удаа 18 каратын алтан суултуур бүтээснээ “America” гэж нэрлээд нэг сая фунт стерлингээр үнэлж байжээ.

Эх сурвалж: BBC