Өнгөрсөн амралтын өдрүүдэд Косовод болсон үндэстэн хоорондын мөргөлдөөний үеэр 30 энхийг сахиулагч бэртэж гэмтсэн юм.

Үүний улмаас НАТО нэмэлт хүчийг тус улсад илгээхээр болсноо өчигдөр зарлажээ.

“Бид Баруун Балкан дахь нөөц хүчнээсээ 700 алба хаагчийг Косовод илгээхээр боллоо” гэж НАТО-гийн ерөнхий нарийн бичгийн дарга Йенс Столтенбэрг өчигдөр Норвегийн нийслэл Осло хотод байхдаа мэдэгдсэн байна.

Шаардлагатай тохиолдолд дайчлах нэмэлт батальоныг өндөржүүлсэн бэлэн байдалд шилжүүлснээ тэр бас мэдээлжээ.

Косовод байрлаж буй НАТО-гийн энхийг сахиулагчдын тоо 3,800 орчим байдаг.

1998 онд Сербийн засаглалыг эсэргүүцсэн Косовогийн албани үндэстнүүд бослого гаргахад 13,000 орчим хүний амь үрэгдэж байв.

Тэдний ихэнх нь албаничууд байжээ.

Үүний дараа 1999 онд НАТО энхийг сахиулснаар цуст мөргөлдөөн зогсож, 2008 онд Косово тусгаар тогтнолоо зарласан юм.

Серби улс одоог хүртэл Косовогийн тусгаар тогтнолыг хүлээн зөвшөөрдөггүй. Косовогийн хүн амын дийлэнх хэсгийг албани үндэстнүүд бүрдүүлдэг. Харин тус улсын Сербитэй хил залгаа хойд бүсэд серби үндэстнүүд голлон суудаг юм.

Энэ бүсэд саяхан болсон орон нутгийн сонгуулийг серби үндэстнүүд бойкотлож, засаг захиргааны албан тушаалд сонгогдсон албани хүмүүсийг хүлээн зөвшөөрөхөөс татгалзаж байгаа.

Өнгөрсөн долоо хоногийн сүүлээр сонгогдсон албан тушаалтнууд захиргааны байранд нэвтрэх гэхэд нутгийн серби хүмүүс тэдний замыг хааж, үүний улмаас цагдаагийн хүчтэй мөргөлдөөн үүссэн юм.

Эх сурвалж: AFP