Илбэнх нь Японы арлуудын уугуул амьтан биш юм. 1977 онд тус улсын телевизээр “Rascal the Raccoon” хүүхэлдэйн кино гарсны дараа энэ амьтан алдаршиж, хүмүүс гадаадаас импортлон гэртээ тэжээж эхэлжээ.
Тэр үеэс хойш хэсэг хугацаанд жил бүр дунджаар 1,500 орчим илбэнх Японд импортлогдож байсан гэдэг.
Гэвч удалгүй энэ амьтныг гэрт тэжээх зохимжгүй нь харагдаж, олон айл өрх илбэнхээ ойд хаяж эхэлжээ. Илбэнхүүд шинэ нутагтаа хурдтай дасан зохицож, тоо толгой нь өсөж, 2008 он гэхэд Японы бараг бүх 47 муж зэрлэг илбэнхтэй болсон байна.
Харин 2005 онд эрх баригчид энэ амьтныг “гаднын эзлэн түрэмгийлэгч амьтны төрөл зүйл” ангилалд оруулан, тоо толгойг нь хязгаарлах арга хэмжээ авч эхэлжээ.
Илбэнхүүд тариан талбайг устгаж, барилга байшингууд, дэд бүтцийн байгууламжуудыг эвдэн сүйтгэх болсон байна.
Японы даяар оршдог хуучны сүм хийдүүдийн 80 орчим хувь илбэнхийн сүйтгэлд ямар нэг хэмжээгээр өртсөн гэх мэдээлэл бий. Мөн арлын уугуул амьтдын газар нутаг, хоол хүнсийг булааж, устах эрсдэлд хүргэж эхэлжээ. Тухайлбал Японы уугуул “тануки” гэгддэг илбэнхийн төрөл зүйл гаднын хамаатнууддаа түрэгдэж эхэлсэн гэнэ.
2020 онд Хоккайдо муж 120 сая иений ($865,000) үр тариагаа илбэнхүүдэд идүүлсэн байна.
Сүүлийн жилүүдэд Нийгата мужид илбэнхийн тоо толгой эрс өссөн тул өсөлтийг нь хязгаарлах арга хэмжээ авч эхэлжээ. Тус мужид анхны илбэнх 2010 онд байгалиас баригдаж байсан бол 2014 онд хоёр дахь нь баригдаж байсан гэнэ.
Харин 2020 онд 10 болж өссөн байна.
Мужийн захиргаа илбэнхтэй тааралдсан тохиолдолд ямар арга хэмжээ авах зөвлөмжийг иргэддээ саяхан танилцуулжээ. Тухайлбал энэ амьтанд ойртохгүй байх, алимны цуу зэрэг бусад шингэн бодисоор шүршиж үргээх, дээвэрт нь үүрлэсэн бол утаж гаргах, хортон шавж устгалын мэргэжилтнүүдийг дуудахыг зөвлөсөн байна.
Эх сурвалж: Kyodo News
