Дөнгөж сая АНУ-ын судалгааны станц саран дээр буулаа. Энэ нь Америкчууд 50 гаруй жилийн дараа саран дээр буцаж ирсэн үйл явдал болсноос гадна саран дээр буусан анхны хувийн өмчийн станц болон түүхэнд бичигдэж байна.
Станц амжилттай буусан ч дэлхийтэй холбогдох радио дохио нь сул байгааг зохион бүтээсэн Intuitive Machines компани мэдээлжээ.
“Манай техник сарны гадарга дээр буусанд эргэлзэх зүйл алга. Бид одоо холбоо тогтоож байна” гэж тус компанийн төлөөлөгч Тим Грэйн хэлсэн байна.
Intuitive Machines компани NASA-гийн санхүүжилтээр Odysseus судалгааны робот станцыг зохион бүтээсэн юм.
LIVE NOW: NASA science is landing on the Moon aboard @Int_Machines’ uncrewed Nova-C lander, named Odysseus.
— NASA (@NASA) February 22, 2024
This is the first time an American commercial lunar lander has made it to orbit around the Moon. https://t.co/Tosd9y9yxi
NASA 2030 оноос өмнө сансрын нисгэгчдээ саран дээр хоёр дахь удаагаа буулгах зорилготой байгаа. Odysseus төсөл нь үүний бэлтгэл ажлын хүрээнд хэрэгжиж байна.
Станц сарны өмнөд туйлын орчимд бууж байгаа юм. Хөрсөн доороо усны нөөцтэй гэж судлаачдын үздэг энэ хэсэг сүүлийн жилүүдэд олон улсын өрсөлдөөний талбар болоод байгаа. АНУ-ын хувьд сарны өмнөд туйлд анх удаа хүрч байна.
Сарны энэ хэсэгт Энэтхэгийн станц өнгөрсөн онд амжилттай бууж, дэлхийн улс орнуудыг тэргүүлсэн юм.
Энэ оны эхээр Япон улс сарны экваторын шугамын орчимд станцаа буулгаж чадсан.
Одоогоор саран дээр техникээ буулгаж чадсан таван улс байгаа нь АНУ, Зөвлөлт Холбоот Улс, Хятад, Энэтхэг, Япон юм.
Эх сурвалж: AFP
