Ухаа худгийг Засгийн газрын тэмдэглэлээр "Энержи ресурс"-д өгсөн биш үлдээсэн асуудал хаврын улс төрийг тодорхойлоод удлаа.

Наанаа Засгийн газар, MCS хоёр байлдаад байх шиг. Цаанаа Х.Баттулга, Ж.Оджаргал хоёрын урьдын цондон үргэлжлэх шиг, яг таг ойлгомжгүй цаг хугацаа өнгөрч байна.

Харин Ухаа худгийг 2009 онд Н.Наранхүү сайдын гарын үсэгтэй тэмдэглэлээр, "Энержи ресурс"-д үлдээснийг хууль зөрчсөн гэж З.Энхболд мэдэгдээд байгаа. Уг асуудлыг шалгаж, дүгнэлт боловсруулан УИХ-д танилцуулна хэмээж буй. Ямартай ч одоо "Ухаа худаг бол том стратегийн орд. Үүний тодорхой хувийг төр эзэмших хэрэгтэй" гэсэн амбицаар ЗГ ажлаа явуулж байна.

2009 онд Санжийн Баяр Ерөнхий сайд байсан. Ер нь манайд шударга бус асуудлыг илрүүлбэл төртэй нөхөцсөн хувийн хэвшлийг нь ялладгаас, хувийн хэвшилтэй нөхцөж өргөсөн тангаргаа умартсан төрийн зүтгэлтнүүдээ зүгээр өнгөрөөдөг жамтай.

Тэгвэл С.Баяр ам нээжээ. Тэр "Ерөнхийлөгч П.Очирбат гуай шогч наргианч хүн байсан. Нэг удаа бидэнд “Том дарга байсан хүн ямар байх ёстой” талаар ярьж билээ. “Том дарга байснаа санагалзан ажиллаж байсан орчноороо бүү хий эргэлд, одооны хэдээ бүү зовоо. Харин дуудвал оч, асуувал хариул, таваглавал хус, хундаглавал тат” гээд маг маг инээж байсан" хэмээн дурдаж.

Тэр Ерөнхий сайд байсны хувьд 17 жилийн өмнөх асуудлаар одоо ч мэдээлэл өгөхөд бэлэн, шалгаад хууль бус нь тогтоогдвол хариуцлагаа ч хүлээж чадна хэмээгээд дараах өнцгүүдийг тайлбарласан нь анхаарал татлаа.

Нэг: Тухайн үед Тавантолгойн ордыг "Энержи ресурс" 2002 оноос хойш эзэмшиж байсан. Энэ хувийн өмч гэж хуулиар явдаг. Гэхдээ төр стратегийн ордоо эзэмшье гэж хэлцэл хийж эхэлсэн.

Хоёр: Харин ямар хуулийн орчин байв. Ашигт шигт малтмалын тухай хуулийн 5.4-т “Улсын төсвийн хөрөнгөөр хайгуул хийж нөөцийг нь тогтоосон стратегийн ач холбогдол бүхий ашигт малтмалын ордыг хувийн өмчит хуулийн этгээдтэй хамтран ашиглавал төрийн оролцооны хэмжээ 50 хүртэл хувьтай байж болно" гэж заасан байсан.

Гурав: Нөгөө талд стратегийн ордод Тавантолгой гэж заасан болохоос Ухаа худаг гэж байхгүй.

Дөрөв: Иймд Тавантолгойн ордод төр хэлцэл хийхдээ 50 хувиас хэтрэх аргагүй байсан. Тэгсэн ч хэд хэдэн удаа хэлэлцээрт ороод, 86 ба 14 хувийн хувилбар боловсруулсан. 86 хувь төрд, 14 хувь "Энержи ресурс"-т.

Тав: Харин давуулж амбицлаад үүнийг 96 ба 4 болгож чадсан нь амжилт гэх. "Энержи ресурс"-т үлдээсэн 4 хувь нь Ухаа худгийн орд.

Зургаа: ЗГ-т өгсөн УИХ-ын чиглэлийн дагуу хэлцлийг хийсэн. Дараа нь асуудлыг УИХ-д танилцуулсан. Дангаар шийдээгүй. Бүгд тухайн үеийн боломж, хууль эрх зүйн орчинд захирагдан явсан.

Ерөнхий сайд асан С.Баяр ийм тайлбар хэлж байна. Өнөөдөр Ухаа худгийн орд дангаараа нийт бүлэг ордын нөөцийн 4 хувь байсан нь үнэн үү? гэдэг л сонин байна. Харин 50 хүртэлх хувьд нь хэлцэл хийх хуультай орчинд Тавантолгойн бүлэг орд 100 хувь "Энержи ресурс"-ийнх байхад, 96 хувийг нь буцааж авсан амжилттай л хэмээгээд буй аж.

Г.САНСАРМАА

https://eguur.mn/579914/