Эрх баригч намын зодоон чамгүй урт хугацаанд өрнөж, эцэст нь Төрийн эрх барих хамгийн дээд байгууллагын дэд дарга Х.Булгантуяа, Төрийн байгуулалтын байнгын хорооны дарга Ц.Сандаг-Очир нар төрийн эсрэг гэмт хэрэг мэдүүлснээр үргэлжилж байна.
Тодотговол, УИХ-ын гишүүн П.Сайнзориг Засгийн газрыг огцруулах гарын үсэг манлайлан цуглуулж, түүнийг нь төрийн байгуулалтын байнгын хорооны хуралдаанаар дарга Ц.Сандаг-Очир удирдан хэлэлцүүлэхдээ Үндсэн хууль зөрчсөн. Улмаар Байнгын хороогоор хэлэлцүүлсэн асуудлаа УИХ-ын чуулганы хуралдаанаар хэлэлцүүлж хууль зөрчсөн төдийгүй олон гишүүдийг хөлдөө чирсэн явдал болоод байна.
Тиймээс нэр бүхий гишүүд Үндсэн хууль зөрчсөн гэж үзэн, Үндсэн хуулийн Цэцэд хандахад Их суудлын хуралдаан УИХ-ын дэд дарга Х.Булгантуяа нь Үндсэн хууль зөрчсөн гэдэг шийдвэр гаргасан. Тиймээс дээрх нэр бүхий гишүүдийн бүрэн эрхийг түдгэлзүүлж, хариуцлага тооцох нөхцөл байдал үүсэж, УИХ-ын дэд дарга Х.Булгантуяа нарт холбогдох асуудлыг шалгаж эхэлсэн гэдгийг эх сурвалж мэдээллээ.
Хэргийг шалгахдаа УИХ-ын дэд дарга Х.Булгантуяад холбогдох хэрэг нь Эрүүгийн хуулийн 19.2 дугаар зүйлд заасан "Төрийн эрх мэдлийг хууль бусаар авах, саатуулах" гэмт хэрэг байж болзошгүй байгаа тул түүнд холбогдох хэргийг харьяаллын дагуу Тагнуулын байгууллага руу шилжүүлэхээр болж байгааг эх сурвалж мэдээлж байна.
Тэгвэл Эрүүгийн хуулийн 19.2 дугаар зүйл /Төрийн эрх мэдлийг хууль бусаар авах, саатуулах/-ийн 1-д "Төрийн эрх барих дээд байгууллагын эрх мэдлийг хууль бусаар авах, хадгалах зорилгоор үгсэн тохирч хүчирхийллийн аргаар авахад бэлтгэсэн, зохион байгуулсан, оролцсон, санхүүгийн дэмжлэг үзүүлсэн; төрийн эрх барих дээд байгууллагын эрх мэдлийг хэрэгжүүлэх үйл ажиллагаанд хүч хэрэглэн саад учруулсан бол арван хоёр жилээс хорин жил хүртэл хугацаагаар хорих ял шийтгэнэ" гэж заажээ.
Тэгэхээр иргэд төдийгүй УИХ-ын гишүүд ч “Зөвхөн жирийн иргэнд хууль үйлчлээд байж болохгүй. Хууль зөрчсөн ямар ч дарга сайд адил тэгш эрхтэй байна” хэмээж байна.
Tumen.mn
