УИХ-ын гишүүн Л.Энх-Амгалан сэтгүүлчдийн асуултад хариулав.
Энэ үеэрээ тэрээр:"Би дуртайдаа сайд болж байгаа юм биш. Надад албан тушаал, сандал ширээ амьдралын минь гол зорилго, чухал зүйл биш. Харин Монгол Улсын 3.5 сая иргэний, ялангуяа хүүхэд багачуудын ирээдүйн төлөө би аль ч нам, аль ч төрийн албан хаагчтай, шаардлагатай бол хэнтэй ч хамтран ажиллахад бэлэн байна.
Ерөнхий сайд надад ийм санал тавьсан учраас би хүлээж авсан. Энэ салбарт ажиллаж, үүсээд буй асуудлуудыг алхам алхмаар шийдвэрлэнэ гэж харж байна.
Өнөөдөр 1–9 дүгээр ангийн бүх хүүхэд, аль ч сургуульд суралцаж байгаагаас үл хамааран ижил тэгш боломжтой байх ёстой. Гэтэл шинэчлэлийн хөтөлбөр, бодлого царцсан нь маш том алдаа, ноцтой дутагдал болж байна.
Ер нь боловсролын салбар багшид тулгуурласан гурван үндсэн бодлоготой байх ёстой. Нэгдүгээрт, багш ямар хүүхэд бэлтгэх вэ гэдэг зорилго тодорхой байх. Хоёрдугаарт, багш ажлын байран дээрээ хэрхэн өөрийгөө хөгжүүлэх вэ гэдэг асуудал. Гуравдугаарт, багшийн ур чадвар, үнэлэмжийг сайжруулах бодлого чухал.
Сайн багш сайн цалин авдаг тогтолцоог бид эхлүүлсэн. Гэтэл 720 тэрбум төгрөг батлагдсан байхад хэрэгжилтийг нь хангаж чадалгүй, бодлогын алдаа гаргасан байна.
Сэлэнгэ аймагт үүссэн асуудлыг би УИХ-ын ажлын хүрээнд танилцаж, богино хугацаанд буюу сарын дотор шийдвэрлэх боломжтой гэж үзэж байна. Учир нь би өмнө нь хөдөлмөр, нийгмийн хамгааллын салбарт цалин хөлсний бодлого хариуцан ажиллаж байсан туршлагатай. Тиймээс багш нарын цалин хөлсний асуудлыг шийдвэрлэх боломжтой. Багш нарыг зовоож, гомдоож болохгүй.
Дараагийн том асуудал бол багшийн хөгжил. Үүний дараа үр дүнд суурилсан санхүүжилт буюу нэг хүүхдэд ногдох хувьсах зардлын асуудал байна. Өнөөдөр нийслэлийн 1 дүгээр сургуульд сурч буй хүүхэд, Хөвсгөл аймагт сурч буй хүүхдийн сургалтын орчин, багшийн арга барил асар ялгаатай байна. Тиймээс гүйцэтгэл, үр дүнд суурилсан санхүүжилтийн тогтолцоог орхиж, хуучин аймагт суурилсан санхүүжилт рүү буцах нь маш буруу, том алдаа гэж үзэж байна.
Мөн үнэлгээний асуудал ч чухал. Хүүхдэд хуурамч дүн тавьдаг, багшийн субъектив үнэлгээнд тулгуурладаг тогтолцоог халж, хүүхэд өөрийн ур чадвараар хөгждөг, хоорондоо өрсөлдөх бус ахиц дэвшлээрээ үнэлэгддэг байх ёстой. Миний хувьд дүнгийн тогтолцоог эргэн харах шаардлагатай гэж үзэж байна.
Хөтөлбөрийн шинэчлэлийн хувьд хичээлийн тоог цөөлөх нь зүйтэй. Монгол хүүхэд оюуны, сэтгэлийн, биеийн гэсэн гурван “тамир”-тай байх ёстой. Энэ чиглэлд суурилсан хөтөлбөрийг шинэчлэн хэрэгжүүлэх шаардлагатай ч бид тодорхой хэмжээнд цаг алдсан байна.
Мөн сургуулийн менежментийн асуудлыг цогцоор нь авч үзэх хэрэгтэй. Хүүхэд гэртээ ойр, чанартай боловсрол олгодог сургуульд суралцах боломж бүрдэх ёстой. Үүнийг шийдэхдээ хувийн сургуулиудтай их хэмжээний гэрээ байгуулж, бүх менежментийг даатгах нь зөв шийдэл биш. Харин төрийн сургуулиудын менежментийг сайжруулж, тогтолцооны алдаа дутагдлыг засах шаардлагатай.
Иймд бид дээрх алдаа, дутагдлуудаа зайлшгүй засч, боловсролын салбарын шинэчлэлийг тууштай хэрэгжүүлэх ёстой." гэлээ.
Б.Төгсбаясгалан
