Уг нь монголчууд улай үзсэн улаан махны хэрүүлийг цээрлэдэг баймаар. Гэтэл УИХ-д сөрөг хүчний үүрэг гүйцэтгэж байгаа Ардчилсан намынхан Төрийн ордонд улаан мах өлгөж, улс төрийн акц хийлээ. Иргэдийн амьдрал, инфляц үнийн өсөлтөд нөлөөлж буй өргөн хэрэглээний гол бүтээгдэхүүн махны үнэ тэнгэрт хадсан гэдгийг он цаг хугацаатай харьцуулж гаргаад чуулганы Их танхимын өмнө томоос том хонины гуя өлгөжээ.

Энэ талаар УИХ-ын гишүүн С.Эрдэнэболд Төвийн бүсээр явлаа. Ард түмэн ууртай байна. Хулгай луйвартайгаа хэн тэмцэх юм бэ гэж байна. Хэн нь хэндээ хариуцлага тооцох юм. Сандал суудлын төлөө тэмцэж, нэг суудалд очихоороо тохирч бүлх залгисан юм шиг болж байна. Иргэдийн ядуурал нэмэгдэж байна. Үнийн өсөлт хаданд гарлаа. Үнэхээр улс мөнгөгүй байна уу гэхээр, үгүй. Нэг хурган даргын идсэн мөнгө л таван тэрбум байна. Үхрийн мах таван жилийн хугацаанд 100 гаруй хувиар бусад хүнсний бараа, бүтээгдэхүүн 50-70 хувиар нэмэгдлээ. Махны үнэ нэмэгдсэнээр малын хулгай өссөн байна. Арван жилийн өмнө 26 мянган төгрөгөөр дөрвөн кг мах авдаг байсан. Гэтэл өнөөдөр нэг кг хүрэхгүй мах авч байна” хэмээн мэдэгдсэн.

Гэхдээ үнэндээ Ардчилсан намынхан махны үнийн өсөлтийг шүүмжилж, ард түмний амьдралыг дээшлүүлэх, эдийн засгийн бодлого, Засгийн газрын бодлогыг шүүмжлэхээс илүүтэй сайдын суудлын сэлгээ, Засгийн газрын тогтворгүй байдлыг бий болгоход акцаа чиглүүлж, ард түмний анхаарал татах гэж улайрч байгаа нь илт байлаа.

Энэ талаар Ардчилсан намын дарга О.Цогтгэрэл “Өнгөрсөн даваа гаригаас эхлэн эрх баригч намынханд манай намын гишүүдийн зүгээс шаардлага тавьж Засгийн газарт хариуцлага хүлээлгэх ёстой гэдэг байр сууриа илэрхийлсэн. Засгийн газар хариуцлага хүлээх хэд, хэдэн шалтгаан бий. АН-ын бүлгийн гишүүдийн зүгээс Ерөнхий сайдад Батлан хамгаалахын сайд Д.Батлутад хариуцлага тооцох саналыг хүргүүлсэн. Ерөнхий сайд одоо болтол хариулт ирүүлээгүй учир "Хариуцлага тооцохгүй юм байна" гэж ойлгож байгаа.Тийм учраас Ерөнхий сайдыг огцруулах саналыг гишүүдээс авч байгаа. Ерөнхий сайдыг огцруулах үндэслэл ганц энэ биш. МАН-ынхан өөрсдөө нэг нэгээрээ гарч ирээд мэдээлэл хийгээд байсан хулгай, авлигын хэргүүд чинь юу болсон. Хулгайтайгаа эвлэрээд дуусах гэж байгаа юм уу” хэмээн мэдэгдсэн.

Үнэндээ ард түмний амьдрал хүндхэн байгаа ч Ардчилсан намынхны энэ акц арай ч “бай”-гаа оносонгүй. Төр төмбөгөр ёс ёмбогор. Ёр билгээ бодсон ч улай үзсэн улаан мах толгой дээрээ өлгөх хүртлээ монголчууд ёс заншлаа гээгүй байна.

БОДЛОГО ЯРИХ ЁСТОЙ СӨРӨГ ХҮЧНИЙХНИЙ ПОП УЛСТӨРЖИЛТ ХЭРЭЭС ХЭТЭРЛЭЭ

Өөрөөр хэлбэл, сөрөг хүчин хүчтэй байж эрх баригчид илүү бодлогын асуудал ярьдаг байх парламентын зарчим манайд үйлчилж байгаа. Гэтэл Ардчилсан намынхан сөрөг хүчний үүргээ хангалттай сайн биелүүлж чадахгүйгээр барахгүй хэрнэ ард түмний худалдаж авч чадахгүй махыг Төрийнхөө ордонд өлгөж, тун нь ихэдсэн улстөржилт явсаны нэг нь улаан махны хэрүүл байлаа. Харин ч сөрөг хүчнийхэн 60 сая малтай, гурван сая хүн амтай монголчууд малчин, хэрэглэгч хоёрыг ингэж холбож, махны экспортыг нэмэгдүүлччихвэл махны үнэ буурна гэдэг тооцоо судалгааг хийж, эрх баригчдаас хариуцлага нэхэх үүрэгтэй байв.

Гэвч үнэндээ Ардчилсан намны энэ сүр дуулиантай акцад бодлого шийдэл, сөрөг хүчний үүргээ гүйцэтгэх шүүмжлэл огтоос байсангүй. Махны үнэ өсөж байгаа тул Засгийн газар огцор гэсэн явцгүй шаардлага тавьж, махаа худалдаж авч чадхгүй ард түмний нүдэн дээр тарган хонины гуя өлгөж, басамжиллаа.

Цаашлаад махны үнийн өсөлт дээр Ардчилсан намынхан ахицтай бодлого ярьж, гарц гаргалааг нь зөв олчихоод эрх баригчдаас ам асуусан бол улс төрийн ч, сонгуулийн ч том оноо болох байлаа. Гэвч бодлого шийдлээс илүү харьцуулсан үнэ тавьж, сайд нарын халаа сэлгээний асуудлыг тавьж байгаа нь яавч зүйд нийцэхгүй нь.

Улмаар Ардчилсан намынхан Засгийн газарт долоон сайдын суудалд санаархсан гэх яриа улс төрийнхний хүрээлэлд өнгөрсөн хугацаанд олон яригдсан. Үнэндээ энэ акц Ардчилсан намынхны Засгийн газарт хамтрах хүсэлтийг харин ч бататгаж байгаагаас ялгаагүй байна.

Эцэст нь, Ардчилсан намынхан хүчтэй сөрөг хүчин болж, бодлого шийдвэрийн мэтгэлцээн, эдийн засгийн гарц гаргалаа ярьдаг байвал ард түмэнд итгэл үнэшилтэй баймаар байна. Сав л хийвэл сайд дарга нар, Засгийн газрыг огцруулах асуудлыг оруулж ирвэл монголын эийн засаг элгээрээ хэвтэх нь, АН-ынхан.