Хотын дарга солигдож шинэ даргатай болсон. Хуучин дарга Х.Нямбаатар гэж ямар даргатай байлаа даа. Өглөө босоод л ажлын хувцастай хотын гудамжинд зогсож байдаг байлаа. Тэр хотын даргын ажил бол улс төрийн биш аж ахуйн ажил гэдгийг мэддэг нэгэн байв. Гэвч түүнийг Д.Пүрэвдагва гэдэг шавилхан залуугаар сольсон. Тэр ерөнхийлөгчийн экс хүргэн бөгөөд МАН ын бичиг цаасны ажил хийж байснаас өөр ажлын туршлагагүй нэгэн юм. Энэ залуугаар сольсон гол шалтгаан нь хотод ажил буцалж түүнийг дагаад мөнгө төгрөг бий болж байснаас үүдэлтэй. Энэ мөнгийг МАН-ын угшилтай дээд дарга нар хувааж авах гэсэн шунал хотын даргыг солих болгосон юм. Ингээд бид ажлын хүрз шиг даргаа хоолны халбага шиг даргаар сольсон юм. Хүрзээр хийдэг ажлыг амны халбагаар хийх гээд үз дээ. Ажил яаж бүтэх вэ гэдгийг та төсөөлөөд мэдсэн байх.

Нөгөө “Сэрэлт” кинон дээр гардаг ах ламын хэлдгээр “заяа чинь тэр дээ” гэхээс өөр үг орж ирэхгүй юм. Нүргэлсэн их ажил дээр ирсэн шинэ дарга бүгдийг нь зогсоож бүтээн байгуулалт гэхээр юу ч хийсэнгүй. Туулын хурдны зам зогсов, Сэлбэ дэд төвийн барилга царцав, үгүй ядахдаа гурав дөрөв дүгээр хорооллын гүүрэн зам хөлдөв гээд бүтээн байгуулалт бүр байхгүй болов. Тэр юу хийж байна вэ тэгвэл. Захиргааны өдөр тутмын бичиг цаасны ажлаа л их юм хийсэн гэж ярихаас өөр юу ч алга. Зайлуул, улс төрийн ажлаас өөрийг хийж үзээгүй түүнд бичиг цаас үйлдвэрлэх нь ажил юм шиг харагдалгүй л яах вэ дээ.

Уул нь хот гэдэг бол аж ахуйн ажил өдөр тутам бүтээн байгуулалт хийж байж энэ олон хүний амьдралыг зохицуулж байдаг газар. Тэрийг тэр хүү юугаа ч мэдэх билээ. Томилсон даргадаа хотын мөнгийг зөөж гүйгээд л байвал болно гэж бодоод байх шиг байна. Хотын төсөвт байсан мөнгө улсын төсөвт шилжиж байгаа гэсэн. Бид түгжрэлгүй явмаар байна, утаагүй болмоор байна, тогны хамааралгүй амьдармаар байна. Энэ бүгдийг хотын шинэ дарга Д.Пүрэвдагва ор тас хаясан. Харин шөнийн марафон гэгчээр тэрбум шахуу төгрөг л хийхэд л тусалсан гэх шив. Өөр олигтой юм дуулдахгүй байна.

Хотын иргэдээ мөнгө гэж харан, яаж шулах вэ гэж боддог МАН-ын хүмүүсийн нэг бололтой. Өчигдөр өглөө гэхэд хот шатахуун байхгүй машин унаж чадахгүй, автобус байхгүй хөл хөлдөх шахаж, яг ийм үед эрх биш газар хороочих нөгөө цахилгаан дугуй ч хуулиар хориглосон байдалтай л байна. Аль дал наяад онд л автобус байхгүй хотын иргэдийн хөл хөлдлөө гэж ярьдаг шүүмжилдэг байж билээ. Тэрнээс хойш хотод юу хийсэн байх вэ энэ МАН. Юу ч хийсэнгүй, харин иргэдийг л холгож газар даахгүй баян болцгоосон доо.

Д.Нацаг Өдрийн сонин