Төр, засгийн үйл хэрэг цэвэр тунгалаг байх эсэх нь тэнд сонгогдсон, томилогдсон хүмүүсийн ёс жудаг, өргөсөн тангарагтаа үнэнч эсэхээс ихээхэн хамааралтай билээ. Харамсалтай нь сүүлийн жилүүдэд төр, засгийн том, жижиг алба хашиж буй эрхэмүүд зүсэн бүрийн хэрэг, зөрчил өдүүлэн иргэдийг бухимдуулсаар байна. Хүний амь хөнөөх, хулгай хийх, хориотой бараа хил давуулж контрбанд үсэргэх гээд хийхгүй хэрэг гэж үнэндээ алга. Бараг өдөр бүр тэдний хэн нэгнийх нь үйлдсэн гэм хэргийн тухай шинэ мэдээ цацагдаж байна.

Саяхан Хил хамгаалах ерөнхий газрын харъяанд байдаг 0218 дугаар анги буюу  Буянт-Ухаа дахь Хилийн шалган нэвтрүүлэх боомтын захирагчаар ажиллаж байсан хурандаа Д.Мөнхчулуун гэгч нь бусдаас авлига хээл аххууль авсан хэргээр Авлигатай тэмцэх газрын мөрдөгчдөд гардуулжээ. Хурандаа Д.Мөнхчулуун нь хилийн цэрэгт офицерийн албыг олон жил хашиж, нэлээд хэдэн жилийн өмнө тэтгэвэрт гарсан нэгэн аж. Гэтэл одоогийн шадар сайд Ө.Энхтүвшингийн нөлөө, шахаагаар буцаж хилийн цэрэгт ороод, уг албан тушаалд томилогдсон байв. Холбогдох хуулиараа бол тэтгэвэрт гарсан хүнийг төрийн тусгай албанд авч ажиллуулахыг хориглосон байдаг. Гэвч дээр дооргүй хуулиа мөрдөхгүй болсон энэ цагт мань эр тийнхүү даргын суудалд заларсан байлаа.

Хурандаа Д.Мөнхчулуун 0218 дугаар ангид очсон цагаасаа эхлэн шонхор шувууг олноор нь хил давуулах хууль бус үйл ажиллаанд шууд болон шууд бусаар оролцож, энэхүү наймааны зуучлагч нартай байнгын харилцаатай байсан тухай зарим эх сурвалжууд хэлж байна. Энэ нь үнэн болов уу. Тэрээр Арабаас ирсэн шонхорын наймаачдын зуучлагч нарын нэг гэгддэг Маржангуль хэмээх казах эмэгтэйгээс их хэмжээний хахууль авч байгаад эрүүгийн цагдаагийнханд үйлдэл дээрээ баригдаж хорих 461 дүгээр ангид саатуулагдсан юм. Одоогоор мөрдөн шалгах ажиллагаа нь хараахан дуусаагүй байгаа ажээ.

Цэргийн тэтгэврийн “өвөө” Д.Мөнхчулууныг уг албан тушаалд томилогдоход  нөлөөлсөн Шадар сайд Ө.Энхтүвшин нь одоо 800 орчим Хятад иргэдийг Монголд оруулж, мөнгө угаах гэмт хэрэг үйлдэх боломжийг олгоод, тэднийгээ улаан цагаан өмөөрсөн болон улмаар хятадуудыг 30 хоног визгүй зорчуулах хуулийн төслийг УИХ-д өргөн барьсан зэрэг дуулиан шуугиан, хэрүүл маргааны гол эзэн болчихоод хуйхаа маажиж сууна. Тэрээр Д.Мөнхчулууны хамаатан ажээ.

Манай дарга нар төрийн өндөр албаныхаа нэр хүндийг ашиглан хууль бусаар өөрийн хүмүүсээ аль ашигтай гэсэн газартаа байршуулж мөнгө тоншдог нь нууц биш. Аягүй бол Ө.Энхтүвшин нь  Д.Мөнхчулууныхаа гараар авлигын бохир мөнгө цуглуулдаг байсан болов уу. Иргэд ингэж хардах нь зүйн хэрэг. Түүний бас нэг ийм ноцтой зөрчил гарч ирэхээр ер юу эсийг эргэцүүлэн хардаж сэрдэх билээ.  Хэрвээ шонхорын наймаанаас мөнгө саах шуналдаа хөтлөгдөөгүй л юм бол аль эрт тэтгэвэрт гарсан хамаатнаа татаж авчраад Буянт-Ухаагийн Хилийн боомтын даргаар томилохгүй байсан байж таарна даа.

О.Баяр

Шуурхай.мн