2016 оны УИХ-ын сонгуулийн үр дүнгээр миний насаараа дэмжиж, зүтгэж явсан Ардчилсан нам “их ялагдал” хүлээсэн юм. Түүнээс хойш орон нутгийн жирийн гишүүд, дэмжигчид бид олон удаагийн хурал, цуглаанд уригдаж алдаагаа давтахгүй, дахин ялалт байгуулах зорилгоор чанартай, чанаргүй, болсон болоогүй олон хурал цуглаанд бүрэн ирцээр оролцсоор дараагийн сонгуультай мөдхөн золгох болжээ.
Аливаа намыг хүчний тэнцвэр дээр тогтвортой байлгахын тулд намын аж ахуй, зохион байгуулалт, байр суурийг хангаж явах хүн бол намын Ерөнхий нарийн бичгийн дарга хүн байдаг. Гэтэл Ардчилсан нам 2017 оноос хойш улстөрийн үйл явдлууд дээр манлайлагч шинж чанараа бүрэн алдаж, үргэлж хоцорч, дагалдаж явдаг боллоо. Тун саяхны жишээ гэвэл, ҮХЦ-ын дарга Д.Одбаярын асуудал дээр ганц үг дуугарахгүй өнгөрлөө. Сөрөг хүчний үүрэг гүйцэтгэх үндсэн үүргээ умартаж, улам бүр агшсаар байгаа Ардчилсан намыг чиглүүлж яваа генсек Ц.Туваан гологдож буйг дараах хэд хэдэн шалтгаанаар оршилгүй хэлье.
Нэгдүгээрт. Манай Ардчилсан намын Ерөнхий нарийн бичгийн дарга Ц.Туваан Монголын Морин Спорт Уяачдын Холбооны дэд тэргүүний албыг МАН-ын дарга асан М.Энхболдыг удирдаж байхад хийж байсан бөгөөд анхнаасаа Ардчилсан намын жирийн гишүүдийн дунд МАН-ын угшилтай хүн “Генсек” ээр томилогдчихвуу гэсэн “хардлага” өнөөг хүртэл яригдсаар ирсэн бөгөөд энэ “найрсаг” хандлага нь улстөрийн хатуу тэмцэл дунд яг л М.Энхболд дарга шиг “аядуу зөөлөн” бодлогоор асуудалд хандах болсон гэж гишүүд бид үздэг.
Хоёрдугаарт. 2018 оны намар “ЖДҮ" мэдэгдэж ард түмний уур бухимдал хар аяндаа хүрээд байх үед Ардчилсан намын генсек намын удирдлагуудыг буруу мэдээллээр хангаж, өнөөх л “аядуу зөөлөн” хандлагаар хандаснаас болж Ардчилсан нам санаачлагаа алдаж, улмаар МАН-ын манлайлах замыг засч өгсөн. Бүр сүүлд нь бүх зүйл болоод өнгөрсний дараа хөхөө өвлийн хүйтэнд үр дүнгүй жагсаал зохион байгуулснаас өөр улстөрийн акц огтхон ч хийгээгүй нь генсек Ц.Тувааны улстөрийн мэдрэмжгүй, дарга нарынхаа аясаар явдаг, “толгой тохивол” ажил хийдэг хүн гэдгийг батлаж өгсөн билээ.
Харин энэ зуур, МАН-ын генсек Д.Амарбаясгалан нь улстөрийн асар өндөр мэдрэмжтэй, хурдтай, овжин , зохион байгуулах өндөр ур чадвартай улстөрч гэдгээ нотлон харуулсныг та бүхэн санаж байгаа байх. Зүйрлэвэл, МАН-ын генсек Ferrari унасан сэргэлэн, цовоо залуу, манай Ардчилсан намын генсек унасан машинаа дордуулсаар орос Пургон болгосон тостой жолооч гэвэл илүү онохоор байна.
Энэхүү зургийг Facebook дахь “Онигоо яриад өг” группээс авсан болно.
Гуравдугаарт. Ардчилсан намын нэр хүнд дээрх “аядуу зөөлөн” бодлогын үр дүнгээр сөрөг хүчин ч юм шиг, цөөн суудалтай жижиг нам ч юм шиг жирийн иргэдийн нүдээр бол Ц.Элбэгдорж, Ч.Сайханбилэг хоёр даргалсаар байгаа ч юм шиг огт ойлгомжгүй нөхцөлд байна. Энэ бодит байдлыг намын удирдлагууддаа ойлгуулж, шийдмэг арга хэмжээ авах ёстой хүн бол намын Генсек Ц.Туваан байх ёстой атал намын удирдлага, гүйцэтгэх зөвлөл, ҮБХ-г бодит аналитик мэдээллээр хангаж, улстөрийн шийдвэртэй алхам хийхгүй явсаар өнөөдрийг хүрлээ. Энгийн интернет орчинд гарч буй иргэдийн залуургүй бухимдал, хоосон хөөсийг “сөрөг хүчин ажилаа сайн хийж байгаа” гэж ойлгож байвал эндүүрэл шүү дарга нар минь.
Дөрөвдүгээрт. Намын сахилга бат хөдөө, орон нутагт бүрэн алдагдсан байна. Ардчилсан намдаа гомдсон, хаягдсан иргэд нэг нэгээрээ бус хэсэг хэсгээрээ Л.Болд, Ж.Батзандан нарын ШИНЭ намд, удахгүй байгуулагдах сурагтай Н.Алтанхуягын намд орно гэсэн хүлээлттэй бас нэг хэсэг гээд нам маань байлдааны талбар дээрээ жад барих цэрэггүй болох төлөвлтэй байна. Өнгөрсөн хугацаанд МАН намд шинэ залуу гишүүн элслээ гэж сонссоноос Ардчилсан намд шинэ гишүүд нэмэгдэж орлоо гэсэн мэдээ үзсэнгүй, харсангүй. Зүй нь энэ ажлыг гардан зохион байгуулж, манлайлах хүн нь генсек Ц.Туваан байх ёстой атал холуур зугатаад энэ чухал ажил руу ордоггүй бололтой.
Сонгууль дөхөж байна, жирийн гишүүд бид Ардчилсан намын шинэчлэлийг “намын дүрэм” сайжирсан, сонгуульд нэр дэвшигчээс 50, 100 сая төгрөг авдаг болсон гэж тайлбарлах уу, Ц.Элбэгдорж, Ч.Сайханбилэг нар намдаа байсаар байгаа гэж тайлбарлах уу? УИХ-д бүлэггүй болсон учир сөрөг хүчин байж чадсангүй гэж тайлбарлах уу.
Эцэст нь хэлэхэд, манай Ардчилсан нам хүний нөөцөөр дутаагүй, зохион байгуулах авьяастай, улстөрийн өндөр мэдрэмжтэй залуу чадварлаг гишүүд гэвэл Л.Гантөмөр, С.Эрдэнэболд, Д.Пүрэвдаваа гэх мэт генсек хийх чадвартай олон сайхан залуус байгааг дурьдах нь илүү биз.
Ахмад гишүүн Ц.Рэнцэнболд
Эрдэнэт хот, 2019.11.25
