Их эзэн Чингис хааны мэндэлсний 857 жилийн ой өнөөдөр тохиож байгаа билээ. Энэхүү өдөр болон Анхдугаар Үндсэн хуулиа баталж, Бүгд Найрамдах Улсаа тунхагласны 95 жил, Монгол бахархлын өдөрт зориулсан шигшмэл 128 бөхийн барилдааныг өнөөдөр 14:00 цагаас “Буянт-Ухаа” спорт цогцолборт болно. Мөн энэ өдөр Чингис хаан одонг "The Hu" хамтлагт гардуулах юм.
Монголчууд бидний бахархал, Эзэн Богд Чингис хаан бээр билгийн тооллын гуравдугаар жарны усан морин жил буюу 1162 оны өвлийн тэргүүн сарын шинийн нэгний өдөр мэндэлсэн билээ.
Монгол Улсын Ерөнхийлөгчийн 2012 оны нэгдүгээр сарын 9-ний өдрийн 4 тоот зарлигаар Эзэн богд Чингис хааны мэндэлсэн огноог холбогдох ажлын хэсгийн дүгнэлт болон ШУА-ын саналд үндэслэн албан ёсны болгож, билгийн тооллын өвлийн тэргүүн сарын шинийн нэгэн хэмээн тогтоон, уг өдрийг "Монгол бахархлын өдөр" болгон тэмдэглэн өнгөрүүлж байхаар тогтсон юм. Үүнээс хойш жил бүр энэ өдрийг тэмдэглэн өнгөрүүлсээр найм дахь жилдээ золгож байна.
