УИХ-ын гишүүн Л.Энхболд “Тавантолгой” ХК-тай холбоотой нүүрсний хулгай гэх гүтгэлгийг хоёр жил гаруй ярьсаар байгаа. Энэ асуудлаар өнөөдөр “Тавантолгой” ХК-ийн ажилчид өөрсдийн байр сууриа илэрхийллээ. Тус компанийн ҮЭ-ээс санаачлан энэхүү хурлыг хийсэн бөгөөд гурван жилийн турш УИХ-ын гишүүн Л.Энхболд ийнхүү хариуцлагагүй мэдэгдэл хийж байгаа нь компанийн хэвийн үйл ажиллагаанд сөргөөр нөлөөлж эхэлжээ. “Тавантолгой” ХК-ийн ҮЭХ-ны дарга Д.Махбалын хэлснээр, нүүрсний хулгай гэх энэ асуудлаас болж “Тавантолгой” ХК-д ажиллаж буй 200 гаруй ажилтнуудын сэтгэл зүйн дарамт хийгээд аж амьдралд ч нөлөөлж эхэлжээ. Тэд сүүлдээ ажлаа хийж байгаагийнхаа төлөө хулгайч нэр зүүж байгаа мэт дарамттай явах болсон байна.
Тэрээр цааш нь хэлэхдээ “Энэ компанид ажиллаж байгаа жирийн ажилчдыг зөвхөн ажлаа хийгээд явж байгаагийнх нь төлөө хулгайч болгож нийгэмд харагдуулж байна. Нүүрс хулгайлсан гэх асуудлыг хууль хяналтын байгууллагаас шалгаж байгаа. Энэ асуудалтай холбогдуулж, компанийн санхүү, нийгмийн хамгааллын асуудлыг гурван жил зогсоолоо. Хулгай хийсэн гэж манай компанийг гурван жил гүтгэлээ. Энэ бол хэрээс хэтэрч байна. Монгол улс чинь дархан хил дээрээ хил, гааль, мэргэжлийн хяналт, тагнуулын албатай. Ийм давхар давхар хяналт шалгалт байж байхад тэр их хэмжээний нүүрс хаагуур нь гараад явчихдаг юм бэ, үнэхээр уурхайчид бид нар энэ асуудалд их гайхаж байна. Хэдэн тонн нүүрс гэнэ үү, замбараагүй их тоо яриад байгаа. Уурхайчид биднй бодож байгаагаар, яагаад ч ийм хэмжээний нүүрс хулгайгаар, хилээр гараад явах ямар ч боломжгүй. Монголоос гарлаа гэхэд маш хатуу хууль хяналттай Хятад улсын хил гааль байна шүү дээ. Тэгэхээр юун машин, машинаар нь тонн тонноор нь нүүрс гаргах, шуудай нүүрс байтугай атга нүүрс гаргахад л хил, гааль яаж шалгадаг билээ. Халаасандаа байгаа юмаа хүртэл шалгуулаад гардаг биз дээ. Тэгэхээр энэ асуудалд үе үеийн уурхайчид маань ч эмзэглэж, ахмад уурхайчид минь хүртэл бидэнтэй хамт тэмцэх хүсэлтэй байгаагаа уламжилсан. Үнэхээр та нар итгэхгүй бол манай уурхай дээр очоод үзээч ээ, бид нарын хувьд маш их эгдүүцэж байгаа. Нүүрс олборлолт гэж юу болохыг өөрсдийн нүдээр хараасай гэж хүсч байна. Нүүрсийг олборлоход эхлээд өнгөн хөрс, саажсан нүүрс гээд гурав дөрвөн үе давхарга явж байж сайн чанарын коксжсон нүүрсээ гаргаж авдаг. Бидний хувьд компаниараа маш их бахархдаг. Маш цөөхөн ажилтантай мөртлөө маш өндөр үр чанартай ажилладаг. Иймд манай компанийг удаа дараа гүтгэн гутааж буй Л.Энхболдыг уучлал гуйхыг бид шаардаж байна. Мөн хууль хяналтын байгууллагыг ч хурдан шалгаж тогтоон, компанийн маань хэвийн үйл ажиллагааг хангахыг хүсч байна” гэлээ.
Мөн “Тавантолгой” ХК-ийн эмч Б.Батмөнх ч өөрийн байр сууриа илэрхийллээ. Тэрээр “Бид улстөржмөөргүй байна, өнгөрсөн жил энэ асуудлаас болж уурхайн үйл ажиллагаа бараг дөрвөн сар зогссон. Нүүрсний хулгай гэх гүтгэлгээс болж, бид өнөөдөр нэмэгдэл урамшууллаа авч чадахгүй байсан бол одоо бүр цалингаа ч авч чадахгүй нөхцөл үүслээ. Бид нар ямар хүнд хортой нөхцөлд ажилладаг гэж бодож байна, битүү тоос тоосонцортой хүнд нөхцөлд ажиллаж байхад яагаад бид нарыг ч гэсэн хулгайч болгож харагдуулаад байгаа юм бэ. Монгол Улс чинь хил гаальтай юм байгаа биз дээ. Тэгэхэд хаагуур нь яаж гаргах юм бэ. Тэгэхээр энэ чинь давхар манай компанийг төдийгүй Монгол улсын хил гаалийн байгууллагыг ч гүтгээд байна шүү дээ. Ийм улстөрийн асуудлаас болж жирийн ажлаа хийж байгаа бид нар хохироод байна. Зөвхөн компанийн ажилтнууд төдийгүй аймаг даяараа хохирч байна. Иймд бид ҮЭ-ийн байгууллагадаа хандан, өөрсдийн эрх ашгийн төлөө тэмцэхээс өөр аргагүй болж байна” гэж ярилаа.
Ийнхүү Өмнөговь аймгаас сонгогдсон УИХ-ын гишүүн Л.Энхболдын гүтгэлгээс болж, 53 жил тасралтгүй үйл ажиллагаа явуулсан Монгол улсын ууган уурхай “Тавантолгой” ХК хүнд байдалд орж байгааг ажилчид нь мэдээлж, Л.Энхболдыг цаашид гүжир гүтгэлгээ зогсоохыг шаардлаа.
О.Баяр
Шуурхай.мн
