Өнгөрсөн дөрөвдүгээр сарын 20-ны өдөр Налайх дүүрэгт байрлах "Эрдэнийн хөгжил" компанийн уурхайд осол гарч, гурван хүний амь эрсэдсэн харамсалтай хэрэг гарсан. Осол болсноос хойш хоёр сарын хугацаа өнгөрсөн боловч одоог хүртэл хэрэг нь шийдэгдээгүй байгаа тул ослоор амиа алдсан иргэдийн ар гэр, өмгөөлөгчийн хамт өнөөдөр хэвлэлийнхэнд хандаж мэдээлэл хийлээ.
Өмгөөлөгч Ц.Монгол "“Эрдэнийн Хөгжил” компани нь 2002 онд зөвшөөрөл аван үйл ажиллагаа явуулж эхэлсэн. Тус компанийн ажлыг өнгөрсөн дөрөвдүгээр сарын 9-ны өдөр Налайх дүүргийн Мэргэжлийн Хяналтын Газраас хааж, уурхайг лацадсан. Гэвч дөрөвдүгээр сарын 12-ны өдөр ажиллахыг зөвшөөрсөн гээд ажилчдаа дуудан хууль бусаар үйл ажиллаагаагаа эхлүүлсэн. Ингээд осол дөрөвдүгээр сарын 20-ны өдөр болж, гурван хүн газар дээрээ амиа алдаж, нэг хүн маш хүнд бэртэл аван эмнэлэгт хүргэгдсэн. Гэтэл осол болсноос хойш хоёр сарын хугацаа өнгөрч байхад ямар ч шийдэгдсэн зүйл байхгүй байна. Хэргийг сүүлд улсын прокурын газар луу шилжүүлсэн гэх боловч хохирогчдын ар гэрт хэрэгтэй холбоотой ямар ч мэдэгдэл ирээгүй, мөн очиж тодруулахад тодорхой мэдээлэл өгөөгүй. Тиймээс энэ хэргийг санаатайгаар хүний аминд хүрсэн гэж үзэж байна. Мөн одоо хүртэл эрүүгийн хэрэг үүсгэж компанийн хөрөнгийг битүүмжлээгүй, дарга нь чөлөөтэй хилээр нэвтэрч байгаад бухимдалтай байна" гэв.
Талийгаач Э.Шижирболд эхнэр, гурван хүүхэдтэйгээ айлын гэр түрээслэн амьдардаг байжээ. Эхнэр нь нурууны хагалгаанд орж байсан тул хөдөлмөр эрхлэх боломжгүй ба бага хүүхэд нь гурван сартай эмнэлгийн хяналтанд байдаг байна. Талийгаач н.Цэгмэд мөн эхнэр, хоёр хүүхэдтэйгээ амьдардаг байсан. Талийгаач Г.Батхуяг эхнэр болон 7-15 насны дөрвөн хүүхэдтэйгээ амьдардаг байжээ.
Талийгаач Г. Батхуягийн эхнэр Г. Болормаа "Маш хэцүү байна. Гэхдээ хэцүү байлаа гээд яахав. Дөрвөн хүүхдийнхээ төлөө амьдрах ёстой. Тэжээгчээ алдсан гээд сард 261.000 төгрөгний тэтгэмж авч байгаа. Миний зүгээс бол ядаж хүүхдүүдээ 18 нас хүртэл сар болгон тэтгэмж өгөөсэй гэж хүсч байна. Би өөрөө нуур, бөөр өвдөөд ажил хийхэд хүндрэлтэй байна. Нөхөр маань л ажил хийж биднийгээ тэжээдэг байсан" гэлээ.
Уурхайд хамт ажиллаж байсан иргэн М. Ганбат "Би “Эрдэнийн Хөгжил” компанид цуг ажиллаж байсан. Дөрөвдүгээр сарын 9-нд Налайх дүүргийн Мэргэжлийн Хяналтын газраас үйл ажиллагааг хааж, уурхайг лацадсан. Тэгтэл дөрөвдүгээр сарын 12-ны өдөр шалгалт шүүлэг болоод өнгөрсөн, биднийг ажиллахыг зөвшөөрсөн гэж хэлээд лацаа авсан. Гадна хаалганы лацыг аваагүй, өөр хаалгаар оруулж, доторх тоног төхөөрөмж дээрх лацыг аваад биднийг ажиллуулсан. Яагаад ингээд ажиллаж байгаа юм бэ гэж асуухад одоо бол шалгалт шүүлэг байхгүй, та нар ажиллаж болно гэсэн. Тэгээд дөрөвдүгээр сарын 18-ны өдөр доор ажиллаж байхад манай бригадын дарга н.Оргил “Энэ нэгдүгээр салон руу хэдүүлээ орохгүй. Энд нуралт үүсэхэд бэлэн болсон байна. Энд ажиллахаа болъё” гээд ажиллаагүй. Тэгээд 19-ний өдөр амраад 20-нд ирэхэд н.Оргил дарга байгаагүй, өөр хүн ахалж ажилласан. Тэр өдөр манай ажилчид өөрсдөө за болъё. Энд нуралт үүсэх гэж байгаа юм чинь бид нар орохгүй гэхэд орчуулагч, хөгжил, зааварлагч Шу нар орж ажилла гэсэн. Тэгэхэд мөн орохгүй гэхэд н.Халзан даргатай ярьж мэдэгдсэн. н.Халзан дарга “Ямарч байсан наад руугаа ор, ороод баруун талын ханыг шулаад нүүрсийг нь олборлоод гараад ир” гэсэн. Тэгээд манай ажилчид орж ажилласан. Би өөр салонд явж байсан. Орой 20.00 цаг өнгөрөөд ажлаа зогсоо, болохоо байлаа гэж хэлсэн. Тэгэхэд нэгдүгээр салонд нуралт үүссэн байсан. Дээшээ очиход манай гурван хүн дарагдаад нас барсан. Нэг хүн нь хүнд бэртсэн байсан. Тэгээд нурлагыг сэтлэх гээд шороог зайлуулж байхад дээрээс аврах анги ирж, хамгийн сүүлийн хүнийг шөнийн гурван цагт гаргасан.
Энэ олон өнчин үлдсэн хүүхдүүд, ар гэрт нь тусламж дэмжлэг үзүүлэх хэрэгтэй. Улсаас энэ хүүхдүүдэд өгсөн юм хоёр сар болоход байхгүй л байна. Ганц ажил хийж, амьдрал залгуулж байгаа хүмүүс нь яваад өгсөн болохоор ард үлдсэн гэр бүлд нь хэцүү л байгаа даа. Ямар ч байсан энэ хэргийг даруйхан шийдэж өгөөч ээ, Ерөнхий прокурорын дарга, цагдаагийн дарга нарт хэлэхэд энэ хэргийг хурдан шийдэж өгөөчээ гэж хүсмээр байна" гэлээ.
П.Энххүслэн