"Ард иргэдийн дунд халдвар тархах эсэх нь цаг хугацааны асуудал"
ЭМЯ-аас коронавирусийн талаарх цаг үеийн ээлжит мэдээллээ хийлээ. Энэ үеэр ХӨСҮТ-ийн Тандалт, судалгааны албаны дарга А.Амбасэлмаа “Улсын хэмжээнд 14207 хүнд тандалт, судалгаа шинжилгээ хийлээ. Өнөөдрийн байдлаар 287 тохиолдол зөөвөрлөгдөн ирснээс 213 хүн эмчлэгдсэн. Сувиллын ажиглалтад 34 хүн байна. 15 улсаас ирсэн иргэдээс коронавирус илэрсний 194 нь ОХУ-аас ирсэн.
Халдвар авсан иргэдийн 70 гаруй хувь нь оюутан, 6-81 насныхан байна. 20-24 насны 114 хүнд халдвар бүртгэгдсэн. Улсын хэмжээнд зургаан лабораторид хоногт 1400-1600 хүнд коронавирусийн шинжилгээ хийх боломжтой. Бид ДЭМБ-аас гаргасан эмчилгээний удирдамж болон улс орнууд өөрийн онцлогт тохирсон арга хэмжээг авч хэрэгжүүлнэ гэж зөвлөсний дагуу эмчилгээ, тандалт судалгааг хийж байна. Ард иргэдийн дунд халдвар тархах эсэх нь цаг хугацааны асуудал. Иргэд амны хаалт зүүх, гараа сайтар савандаж угаах, олон нийт цугларсан газраар явахгүй байх зэрэг халдвараас сэргийлэх зөвлөмжийг алдахгүй дагахыг сануулмаар байна.
Бусад улс оронд эдгэрсэн хүмүүст эмнэлгээс гарахад нь коронавирусийн давтан шинжилгээг хийхгүй байгаа. Харин улс бусад улсуудыг бодвол арай өөр системээр ажиллаж байна. Хүн амын дунд халдвар алдаагүй учраас бид алдахгүйн тулд хяналт, тандалт, ажиглалтыг тусгаарлалтын хугацаанд үргэлжлүүлсээр байгаа. Бид эдгэрсэн хүмүүсээс дахин коронавирус илрэхгүй байх хүртэл нь эмчилгээ, ажиглалт тусгаарлалтад байлгана.
Манайд эмчлэгдээд эдгэрсэн 31 хүнээс дахин коронавирус илэрсэн. 8-9 нь ажиглалтын 14 хоног нь дууссанаас хойш гурван удаагийн шинжилгээгээр сөрөг гарсан иргэдийг тусгаарлалтаас гаргасан. Австралиас ирсэн 48 хүн тусгаарлагдаж байгаа. Тэр хүмүүс улсдаа шинжилгээ хийлгээд ирсэн. Энэ хүмүүсийн шинжилгээний сорьцыг өнөөдөр авна” хэмээв.
