Хилийн чанадаас ирсэн иргэдийг тусгаарлах Энхсаран сувилал дээр халдвар хамгааллын дэглэм алдагдсанаас болж коронавирус алдагдсан байх магадлалтай болоод байгаа.

Тийм ч учраас УОК-оос Энхсаран сувилалд тусгаарлагдаж байсан иргэдийг өнөөдөр нүүлгэлээ. Энэ талаар ОБЕГ-ын дэд дарга, хурандаа Б.Ууганбаяр “УОК-ын даргын өгсөн үүргийн дагуу Энхсаран сувилалд байсан иргэдийг өнөөдөр өглөө нүүлгэн шилжүүлэх ажлыг зохион байгууллаа. 3-р байранд байсан иргэдийг ХӨСҮТ бүхэлд нь татаж авсан. Өнөөдөр бид 4, 1 дүгээр байранд байгаа иргэдийг зөөвөрлөж байна. Эдгээр 2 байр 3 дугаар байраасаа тусдаа байршилтай. 4 дүгээр байранд байгаа 70, 1 дүгээр байранд байгаа 11 хүнийг НЭМГ, Нийслэлийн шуурхай штабтай хамтраад шилжүүлэх ажлыг зохион байгууллаа. Энхсаран сувилалд үлдэх тухайн байгууллагын ажилчид болон резидент эмч, харуул хамгаалал, онцгой байдлын байгууллагын хүмүүсийг ХӨСҮТ-ийн зөвлөмжөөр тусад нь тусгаарлаж ажиглалтад байлгана. Эцсийн халдваргүйжүүлэлтийг ЗӨСҮТ-ийнхөн зохион байгуулна. Хатуу хараа хамгаалалт дор Энхсаран сувиллыг цаашид тусгаарлана. Цаашид Энхсаран сувилалыг тусгаарлалтын зориулалтаар ашиглахгүй” гэлээ.

Эх сурвалж: shuurhai.mn Б.ЗАЯА