Цэргийн ногоонтойгоо бас нэгэн хүү амь эрсэджээ. Энэ удаа хугацаат цэрэг биш албан хаагч. Хэн ч нь ялгаагүй, цэргийн хүү. Эх орныхоо төлөө тангарагтай залуус энхийн цагт цаг бусаар амиа алдах явдал сэрдхийх хэрэг биш болох нь.

Баянзүрх дүүргийн 22-р хорооны нутаг дэвсгэрт байрлах Зэвсэгт хүчний 032 дугаар ангийн алба хаагчид нэгнийхээ аминд хүрсэн хэрэг 4 хоногийн өмнө гарчээ. Хэдхэн сарын өмнө тус ангийн хал цэргүүд шинэ цэргүүдээ дарамталж буй бичлэг олон нийтийн сүлжээнд ил болсон.

Хугацаат цэргийн албан хаагчид амиа алдсан хэрэг он гарсаар хэдэнтээ бүртгэгдсэн. Шалгалтын ажиллагаа дуусаагүй хэргүүд ч байна. Батлан хамгаалахын яамнаас цэргийн ангиудад сэтгэл зүй, зан суртахууны зөв хүмүүжил олгох сургалтууд хийсээр байгаа гэх. Гэвч цэргийн ангид, цэргүүд, одоо бүр албан хаагчид нэгнийхээ аминд хүрдэг болж байна. Сургалт явуулаад, нэг хоёр хүнийг ажлаас нь чөлөөлөөд энэ салбар дээрдэхгүй нь гэдгийг хүний амь нас батлан харуулсаар байна. Цаашид энэ салбарын цогц шинэчлэлт шаардлагатай болжээ, Г.Сайханбаяр сайд аа!

Эх сурвалж: shuurhai.mn Г.ОЧИР