-СУВИЛАЛД ТУСГААРЛАГДСАН ХАЛДВАРТАЙ ИРГЭД ӨРӨӨ ХЭСЧ, АРХИДАН СОГТУУРДАГ БАЙСАН НОЦТОЙ ЗӨРЧИЛ ИЛЭРЧ БАЙВ-

Улс даяар тархаад байгаа коронавирус анх олон нийтийн дунд тархах болсон шалтгаан Энхсаран сувилалтай холбоотой болох нь олон нийтэд ил болсон билээ.

Хилийн чанадаас ирсэн иргэдийг амралт, сувиллын газруудад тусгаарлаж байсны нэг нь Энхсаран сувилал. Тусгаарлалтын сувиллын газруудад улсаас санхүүжилт олгож байсан бөгөөд тус сувилалд гэхэд 1.3 тэрбум төгрөгийн төсөв өгсөн байдаг.

Гэвч тус сувиллын үйл ажиллагаа, орчин нөхцөл халдвар хамгааллын дэглэмийг ноцтой зөрчсөнөөс халдвар тархаж, тэр бүү хэл олон нийтийн дунд бий болсон нь тогтоогдсон юм. Тодруулбал, тусгаарлагдсан иргэд өрөө дамжин явдаг байсан, архи согтууруулах ундаа хэрэглэдэг байсан. Тусгаарлагдсан иргэдэд тавих хяналт муу, халдвар хамгааллын дэглэм алдагдсан байдаг.

Энэ явдлаас үүдэж тус сувиллын үйл ажиллагааг хааж, удирдлагын нэр бүхий хүмүүсийг хууль хяналтын байгууллагаас авлига албан тушаалын хэргээр шалгаж эхэлсэн юм. Тэгвэл уг хэргийн шалгалт дуусч, шүүхэд шилжжээ.

Хан-Уул дүүргийн прокурорын газраас О.Түмэнбаяр нарын 9 яллагдагчид Эрүүгийн хуулийн тусгай ангийн 15.6 дугаар зүйлийн 1 дэх хэсэгт заасан / Бусдын амь насанд аюул учруулж болзошгүй халдварт өвчин дархлал хомсдлын вирус халдаах/ хэрэгт яллах дүгнэлт үйлджээ.

Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүх өнөөдөр урьдчилсан хэлэлцүүлгийн шүүх хуралдаанаар хэргийг хянан хэлэлцээд ЭХХШТХ-ийн 33.3 дугаар зүйлийн 1.2 дахь хэсэгт заасан “Шүүх хуралдаанаар нөхөн гүйцэтгэх боломжгүй мөрдөн шалгах ажиллагаа” хийлгэхээр прокурорт буцаажээ.

Эх сурвалж: shuurhai.mn Г.ОЧИР