Ялагдалаар дамжсан ялалт
Консерватив намын удирдагчийн төлөөх өрсөлдөөнд ялагдсанаас хойш долоон долоо хоногийн дараа Риши Сунак хоёр дахь удаагийн өрсөлдөөндөө ялалт байгуулж чадлаа. Түүний цорын ганц өрсөлдөгч нь "марафон"-оос татгалзаж байгаагаа зарласны дараа тэрээр намынхаа гишүүдийн шаардлагатай 100 саналыг авсан цорын ганц оролцогч, бас ялагч болжээ.
Ийнхүү Сунак Тори намын дарга болж, албан ёсны процедур дууссаны дараа түүхэн дэх анхны Ази гаралтай Британийн Ерөнхий сайд болох юм.
Наймдугаар сард Сангийн сайд асан Риши Сунак Ерөнхий сайдын суудлын төлөөх өрсөлдөөнд фаворитуудын нэг байсан ч Лиз Трасст ялагдсан.
Харин энэ удаад тус улсын хамгийн өндөр албан тушаалын төлөөх хоёр дахь оролдлого Жонсон нэрээ татсаны дараа амжилттай болох нь бараг тодорхой болчихлоо. Одоо түүний өрсөлдөгч нь олонд төдийлөн танигдаагүй Пенни Мордаунт болж хувирав.
Риши Сунак ямар удирдагч байж чадах вэ?
Ерөнхий сайдын төлөөх наймдугаар сарын өрсөлдөөний үеэр Сунак Их Британийн эдийн засагт голчлон анхаарч, хямралаас гаргах төлөвлөгөөгөө санал болгож буй.
Сунак тэр үед BBC-д өгсөн ярилцлагадаа "худал амлалтаар ялахаас" илүүтэй лидерийн төлөөх өрсөлдөөнд ялагдсан нь дээр гэж хэлсэн нь өрсөлдөгч Лиз Трассын татварыг бууруулах амлалт илэрхий бүтэлгүй гэдгийг хэлсэн хэрэг байв.
Риши Сунак зах зээлд сүүлийн үед үүсээд буй үймээн самууны талаар ямар нэгэн тайлбар хийгээгүй бөгөөд тэрээр улс орноо "эдийн засгийн гүн хямралаас" гаргахын тулд, мөн Тори //намаа нэгтгэхийн тулд Ерөнхий сайдын албан тушаалд нэр дэвшиж байгаагаа мэдэгдээд буй.
Сунак 2020 оны 2-р сард Сангийн яамны канцлер болж тахлын дэгдэлт болон удаан үргэлжилсэн хөл хорионы нөхцөлд Их Британийн эдийн засгийг удирдах үүрэгтэй тулгарсан.
Олонх британичуудын хувьд тэр архи уудаггүй, харьцангуй залуу хүн. Хөл хорионы эхэн үеэр тэр 40 нас хүрсэн.
2020 оны хавар тэр цар тахлыг даван туулахын тулд улс орныхоо төлөө чадах бүхнээ хийхээ амлаж, иргэд, аж ахуйн нэгжүүдэд 350 тэрбум фунт стерлингийн дэмжлэг үзүүлэхээ зарласан бөгөөд санал асуулгаар түүний хувийн рейтинг огцом өсч байв.
Гэсэн хэдий ч Их Британийн эдийн засаг шуургатай хэвээр байлаа. Сунак өөрөө 2020 оны 6-р сард Даунинг гудамжинд хөл хорионы дэглэмийг зөрчсөн хэргээр торгууль хүлээж байв.
Үүний зэрэгцээ Сунак болон түүний гэр бүлийн санхүүгийн асуудал олны анхааралд орж, эцгийнхээ Энэтхэгийн Infosys компанид багагүй хувийг эзэмшдэг, өнгөрсөн жил 10 сая фунт стерлингийн ногдол ашиг авсан эхнэр Акшата Муртигийн татварын асуудал шуугиан дэгдээсэн юм.
Мурти татвараас зайлсхийсэн хэрэгт буруутгагдаж, нөхрийнхөө улс төрийн дарамт шахалтыг багасгахын тулд тэр хилийн чанад дахь орлогоосоо Британид татвар төлж эхлэхээ мэдэгджээ.
Риши Сунак гэж хэн бэ
Сунакийн эцэг эх Энэтхэгчүүд бөгөөд Зүүн Африкаас Их Британид иржээ. Тэрээр 1980 онд Саутхэмптон хотод төрсөн бөгөөд аав нь ерөнхий эмч, ээж нь эмийн сан эзэмшиж, ажиллуулдаг байжээ.
Тэрээр Винчестер коллеж хэмээх элит хувийн сургуульд суралцжээ, Дараа нь Сунак Оксфордод философи, улс төр, эдийн засгийн чиглэлээр суралцсан. .
Стэнфордын их сургуульд суралцаж байхдаа тэрээр ирээдүйн эхнэр, Энэтхэгийн тэрбумтан, мэдээллийн технологийн Infosys компанийн үүсгэн байгуулагч Нараяна Мертигийн охин Акшата Мертитэй танилцжээ.
Хосууд хоёр охинтой. 2001-2004 онд Сунак Goldman Sachs-д шинжээчээр ажиллаж байсан. Түүнийг парламентын хамгийн баян гишүүдийн нэг гэгддэг хөрөнгө орогынхоо талаар олон нийтэд мэдээлдэггүй.
Sky News-ын хөтлөгч Кэй Берли түүнээс өөрийгөө Ерөнхий сайд болоход хэтэрхий баян гэсэн мэдэгдлийг хэрхэн хүлээж авч байгааг асуухад " инфляци бүх иргэдэд нөлөөлж байгаа бөгөөд Лиз Трассаас ялгаатай нь сүүлчийн сонгуульд түүний хөтөлбөр нь ядууст туслах зорилготой байгааг дурджээ.
2015 онд Сунак Йоркшир мужийн Ричмонд хотын парламентын гишүүн болж, Тереза Мэйгийн засгийн газарт албан тушаал хашиж байжээ. Харин Борис Жонсон түүнийг Төрийн сангийн тэргүүн нарийн бичгийн даргаар томилж байв.
2020 оны 2-р сард тэрээр Сангийн сайдаар томилогдсон бөгөөд Жонсоныг эхэндээ хүчтэй дэмжиж байсан ч дараа нь өөрийн эдийн засгийн бодлого нь Ерөнхий сайдынхаас эрс ялгаатай гэж үзэж огцорсон юм.
Эх сурвалж: ВВС
