Мягмар гарагт Туркийн парламент Швед улсыг НАТО-д гишүүнээр элсүүлэхийг дэмжсэн шийдвэр гаргалаа.

Ингэснээр бараг 20 сар үргэлжилсэн асуудал гацаанаас гарч байна.

2022 онд Орос улс Украины нутаг дэвсгэрт халдан довтолсны дараа Швед, Финланд улсууд уламжлалт төвийг сахих гадаад бодлогоосоо татгалзаж, Умард Атлантын цэргийн эвсэлд элсэхээр болсон юм. НАТО-гийн бүх гишүүн орон дэмжвэл шинэ гишүүнийг баталдаг. Гэтэл Турк улс дипломат маргааны улмаас Шведийн гишүүнчлэлд хориг тавиад байв.

Өчигдөр ерөнхийлөгч Рэжэп Тайип Эрдоганы эрх баригч намын эвсэл олонхыг бүрдүүлдэг Туркийн парламент уг асуудлыг 287:55 харьцаагаар дэмжжээ.

Туркийн парламент Финландын гишүүнчлэлийг өнгөрсөн оны дөрөвдүгээр сард дэмжсэн юм.

“Бид эвслийнхээ батлан хамгаалах хүчин чадлыг сайжруулах зорилгоор НАТО-гийн өргөжилтийг дэмжиж байна. Финланд, Шведийн терроризмтой тэмцэх бодлого нь манай бусад холбоотнуудад үлгэр жишээ болно гэдэгт найдаж байна” гэж Туркийн парламентын гадаад харилцааны байнгын хорооны дарга Фуат Октай мэдэгджээ.

Хоёр улсын маргаан нь Туркийн засгийн газрын террорист байгууллага гэж үздэг Курдийн салан тусгаарлах хөдөлгөөний гишүүдийг Швед улс нутаг дэвсгэртээ орогнуулдагт байсан юм.

Шведийн гишүүнчлэлийг дэмжсэн тогтоолыг ерөнхийлөгч Эрдоган ойрын үед батлах гэж байна.

Ингэснээр Шведийн гишүүнчлэлийг дэмжээгүй үлдсэн ганцхан улс нь Унгар болж байгаа юм. ОХУ-ын ерөнхийлөгч Путинтэй найрсаг харилцаатай гэгддэг Унгарын ерөнхий сайд Виктор Орбан өчигдөр Шведийн талыг яриа хэлэлцээнд урьж байгааг мэдэгджээ.

Унгарын парламент хоёрдугаар сарын дунд үе хүртэл завсарлаад байгаа юм.

НАТО-гийн гишүүн орнуудаас Турк, Унгар хоёр Орос улстай хамгийн сайн харилцаатай байдаг.

Турк улсад F-16 сөнөөгч онгоцоо нийлүүлэх шийдвэрийг АНУ гаргах нөхцөлөөр Шведийн гишүүнчлэлийг Эрдоган дэмжсэн байх гэсэн таамаг яригдаж байна.

Хэдийгээр Цагаан ордон орчин үеийн байлдааны зэвсэг техникээ Турк улсад нийлүүлэхийг дэмжиж байгаа ч АНУ-ын Конгресс үүнийг хэзээ батлах нь тодорхойгүй байгаа юм.

Эх сурвалж: Reuters