Хөлбөмбөг гэлтгүй хүчирхэг багууд довтлогч гэхээсээ холбон тоглогч нарыг өндөр үнээр авдаг. Ганц хөл бөмбөг гэлтгүй баг бүхэнд холбон тоглогч нарын ур чадвараас хамаарч амжилт, алдаа оноо нь дэнслэгдэж байдаг билээ. Улс төрд ч ялгаагүй лидер гэхээсээ холбон тоглогч, хамгаалагч, хаалгачаасаа эхлээд багийн уур амьсгал, эв нэгдлийг илэрхийлэгч хэрэгтэй.

Нэгэнтээ хүчирхэг байсан Ардчилсан намд бүлэглэлүүд задарч хувь тоглолт хийж эхлэх үед Л.Гантөмөр өөрийн гэсэн баг бүрдүүлж, улс төрийн тоглолт хийсэн билээ. Энэ үед Лу.Гантөмөр лидер шинжгүй, хүлээн зөвшөөрөгдсөн кандитатаар багаа бүрдүүлсэнгүй хэмээн шуугилдаж байв. Түүнийг тодорхой хэмжээний хувь тоглолттой, имижтэй улстөрчдөөр өөрийгөө хүрээлүүлсэнгүй хэмээн шүүмжилж байв. Тэр дундаа Энхтөрийн Галбадрал хэмээх залууг зөвлөх, ажлын албаны даргаар томилсон нь ийм шүүмжлэл гарахад хүргэсэн байх.

АНУ-д консул, "Эрдэнэт үйлдвэр"-ийн орлогчоор хүртэл ажиллаж байсан Э.Ганбадрал хамгийн сайн холбон тоглогч байв. Тэрбээр АН-ын арван тийшээ харсан “агаа, эгээ” нарын учир зүйг олоход, холбоход гол үүрэг гүйцэтгээд зогссонгүй. Бүр сөрөг хүчний удирдагч нартай харилцаа тогтоох (У.Хүрэлсүхийн зөвлөх) хальсан ажиллагааг амжилттай удирдсан байдаг.

Л.Гантөмөр ийм залуусаар өөрийгөө хүрээлүүлж дүр төрхөө тодотгоод зогсохгүй хүчээ авах шинжтэй болж ирэв. Тайзны голд нь нэг нөхөр бүжиглээд байх нь бус бүгдээрээ урагш ахих хэрэгтэй гэдгийг Л.Гантөмөр ойлгосон нэгэн. Бүгд лидер бус ажилч хичээнгүй урагшлах нь амжилтад хүргэх гишгүүр болдог биз ээ.

С.ШАРХҮҮ