Хураангуй:

• УИХ-ын гишүүн Б.Түвшингийн компани 1XBET-ийн гол дамжуулагч гэх яриа хөшигний ард түгээд байна.
• Б.Түвшин нь мөнгө хүүлэх чиглэлд дөрвөн ББСБ-тай байснаа нэг болгон цөөлжээ.

Дэлгэрэнгүй:

-1XBET-ээр 285 сая ам.доллар буюу 21 хувийг Б.Түвшингийн компани гадагшлуулсан уу-

"Сүүлийн дөрвөн жил 1XBET-ээр дамжиж Монгол улсад 1 сая ам.доллар орж ирж, гадагш 500 сая ам.доллар /₮1.7 их наяд/ валют урссан" гэдэг тоог албаныхан хэлээд буй.

Харин одоо УИХ-ын чуулганаар хэлэлцэгдэж буй Зөвшөөрлийн тухай хуульд нэмэлт өөрчлөлт оруулах тухай хуулийн төслийн өргөн мэдүүлсэн танилцуулга d.parlianment.mn сайтад нээлттэй бий бөгөөд үүнээс анхаарал татсан нь:

• Мөрдөн шалгах ажиллагааны явцад Арабын Нэгдсэн Эмират, Хонг Конг зэрэг улсуудад бүртгэлтэй хуулийн этгээдтэй Монгол улсад бүртгэлтэй ААН 6.000-77.000 ам.доллар хүртэлх гэрээ байгуулж, 1XBET-ээс манайх руу зар сурталчилгааны зорилгоор 3,345,468,075 төгрөг /$976,779/ шилжүүлсэн. Манай улсаас 1.7 их наяд төгрөг /$500 сая/ агентуудаар дамжаад гадагш гарсан.

• Цагдаагийн байгууллага, 1XBET сайтаар дамжуулан олсон хөрөнгийг гуйвуулах, нуун далдлах, оффшор эргэлтэд оруулах, мөнгө угаах хэрэгсэл болгох, бусдын эд хөрөнгийг залилах, хар тамхи, мансууруулах бодисын хэрэглээг далд байдлаар дэмжих, мөрийтэй тоглоом тоглох, авлига, албан тушаалын гэмт хэргийн замаар олсон мөнгийг угааж байгаа нөхцөл байдал тогтоогдсон.

• ХЗДХЯ-наас төлбөрт таавар, бооцоот тоглоомын зөвшөөрлийг “Темп партнерс” ХХК, “Эн Зэт Жи Эм” ХХК, “Мон Экс Бэй Ти Билэг” ХХК-д олгосон. Гэвч ЗГХЭГ-ын дарга Н.Учрал гурван компанийн зөвшөөрлийг цуцалсан гэсэн.

Олон айлын амьдралыг үрэн таран хийж, буй цахим мөрийтэй тоглоом зохион байгуулагчдын дунд нэр бүхий УИХ-ын гишүүний эзэмшилтэй компани байж болзошгүй ноцтой мэдээлэл байна. Гадагш урссан гээд байгаа шилжүүлгүүдийн 90 гаруй хувь 2024 оны байдлаар гадны критпо вальютын чиглэлээр үйл ажиллагаа гурван компанид л төвлөрсөн гэх. Тэгвэл монголоос гүйлгээ хийгчдийн 80 орчим хувийг хоёр иргэн, хоёр ААН гэсэн ДӨРВӨН нэгж л эзэлж байгаа аж. Эдгээр гол шилжүүлэгчид дунд 285 сая ам.долларын /21%/ гүйлгээг "Чойжин Алтекс" ХХК хийсэн гэх мэдээлэл байна. Гүйлгээгээ олон удаагийн давтамжтайгаар 2-3 жил дамнуулан шилжүүлсэн гэгдэж байгаа юм.

Нээлттэй мэдээллийн сангуудаас хайж үзэхэд 6785123 регистрийн дугаартай "Чойжин Алтекс" ХХК-д УИХ-ын гишүүн Банзрагчийн Түвшинтэй шууд хамааралтай харагдаж байна. Тус компани 2021.11.18-нд үүсгэн байгуулагдсан бөгөөд хувьцаа эзэмшигчээр Банзрагчийн Түвшин, Цогтбаатарын Энхжавхлан, Эрдэнэбатын Энхзул нар бүртгэлтэй байна. Удирдах албан тушаалтан нь Цогтбаатарын Энхжавхлан, эцсийн өмчлөгч нь Эрдэнэбатын Энхзул. 2022 онд виртуал хөрөнгийн үйлчилгээ үзүүлдэг гэж бүртгүүлжээ.

-НИТХ-ын төлөөлөгч байхдаа дөрвөн ББСБ-аар мөнгө хүүлдэг байсан бол 2023 онд гацхан ББСБ-тай үлджээ-

Нэг. Б.Түвшин 2016-2020 оны хооронд НИТХ-ын төлөөлөгч байхдаа мөнгөтэй, бийлэг хүмүүсийн нэг хэмээн онцлогдон бичигдэж байлаа. Учир нь тухайн үед “Хас хаан”, “Завхан санхүүгийн нэгдэл”, “Эрдэнэт санхүүгийн нэгдэл”, “Хан алтайн нуруу” зэрэг дөрвөн ББСБ-уудад хувь эзэмшиж, мөнгө хүүлдэг байсан юм. Хамгийн сүүлд буюу 2023 онд гаргасан ХОМ-ээс нь 20 гаруй компанид хувь эзэмшдэг ч, "Хас хаан" гэсэн ганцхан ББСБ үлдсэнийг харж болно.

Хоёр. Б.Түвшин бас "Миг" даатгал, "Тэгш арвид" ХХК-д хувь эзэмшдэг. Эл хоёрыг ЗГХЭГ-ын дэд дарга асан Дааданхүүгийн Батбаатарын төрсөн дүү Д.Долгортой хамтран эзэмшдэг. Д.Долгор нь жагсаал зохион байгуулагч Б.Цацралын хадам эгч. “Агула даатгал”-ын Гүйцэтгэх захирал Д.Долгор нь өөрөө 2002 оноос эхлэн “Монгол даатгал”, “Бодь даатгал” зэрэг даатгалын томоохон компаниудад ажиллаж байсан. Хамгийн сүүлд өнөөгийн УИХ-ын гишүүн Б.Түвшингийн үүсгэн байгуулсан “Миг даатгал” компанид 2019-2021 онд Даатгал хариуцсан дэд захирлын алба хашсан.

Сэтгүүлчийн тэмдэглэл: Б.Түвшин ажлын гараагаа "сахал" Д.Эрдэнэбилэгийн Худалдаа хөгжлийн бакны эдийн засагчаар эхэлж байсан намтартай. Улмаар УИХ-ын гишүүн асан Д.Эрдэнэбатын “Эрэл” ХХК-д нягтлан бодогч, УИХ-ын гишүүн асан Г.Батхүү агсны “АПУ” ХХК-д Санхүү хариуцсан захирлаар, ажиллаж байгаад НИТХ-ын төлөөлөгч болсон.

Б.Түвшинг өнөөгийн парламентад Ц.Элбэгдорж, С.Баярцогт нарын дэмжлэгээр сонгуульд нэр дэвших квот авсан хэд хэдэн хүмүүсийн нэг нь гэгдэж байв.

Тэгэхээр банк бус санхүүгийн байгууллага, даатгалын компани, нэмээд цахим мөрийтэй тоглоомын салбарт гараа дүрсэн хүн. Өдгөө Зөвшөөрлийн тухай хуулиар цахим мөрийтэй тоглоомыг хориглож, хязгаарлах гэж байгаа. Энэ утгаараа АН-ын бүлэгт нөлөөлөх боломжтой дүр юм.

Eguur.mn