ТЕГ-ын дарга асан Б.Хурц телевизээр ярилцлага өгөх үеэрээ: "Өөрийгөө тагнуулч гээд байгаа Д.Цогтбаатар бол 1947 онд урдаас орж ирсэн хүний хүүхэд. Монгол хүн биш, яаж яваад тагнуулд орсныг мэдэхгүй. Аавынх нь хамаатнууд одоо ч Хятадын цэрэг, армид ажиллаж байгаа" хэмээсэн билээ. Тэгвэл ТЕГ-ын Сөрөх тагнуулын газрын дарга асан, хурандаа Д.Цогтбаатар хариу тайлбар өгч, мэдэгдэл гаргажээ.
Уг мэдэгдэлд, "Б.Хурц гэгч "Парламент ТВ"-д өгсөн ярилцлагадаа Д.Цогтбаатар миний үндэс угсааг дур мэдэн тодорхойлж, намайг монгол хүн биш хэмээн гүтгэн доромжилж улмаар ТЕГ-т яаж орсон нь тодорхойгүй, Сөрөх тагнуулын газрын даргаар ердөө хоёр сар ажилласан мэтээр үндэслэлгүй мэдээллийг түгээж, миний нэр төр, алдар хүндэд халдсан. Энэ хүний тараасан худал мэдээллийг ЦЕГ-ын харъяа Улсын Мөрдөн байцаах албанд хэрэг бүртгэлтийн 240200417 дугаартай хэрэг нээн шалгаж байгаа бөгөөд өмнө нь намайг Германы иргэний болон бусад олон хэрэгт холбож, удаа дараа гүтгэсэн болохыг шүүхээс тухай бүр эцэслэн шийдвэрлэсэн болно.
Миний өвөг дээдэс олон үеэрээ Монгол нутагтаа амьдран сууж, улс орныхоо тусгаар тогтнолын төлөө зүтгэж, гавьяа байгуулж ирсэн эгэл жирийн монгол хүмүүс болохыг нотлох баримт холбогдох төрийн байгууллагуудад бий. Хятадын цэргийн байгууллагад ажилладаг миний хамаатан гэх хүмүүсийн талаарх баримт нотолгоог Б.Хурц хуулийн байгууллагад гаргаж өгөх биз ээ.
Миний бие 1998 онд тухайн үеийн Улсын Аюулгүй байдлыг хангах газар (өнөөгийн ТЕГ) -ын Хүний нөөцийн хэлтсээс Тагнуулын байгууллагад ажиллахыг санал болгосны дагуу анх ажилд орж, тус газарт ажилтнаас тасаг, хэлтэс, газрын дарга хүртэл бүхий л шат дамжлагаар мерит зарчмаар тасралтгүй ажиллаж ирсэн. Намайг сонгон судалж, Тагнуулын байгууллагад ажиллах санал тавьсан УАБХГ-ын холбогдох хэлтсийн дарга, ажилтнууд одоо ч энх тунх, амьд сэрүүн байна.
Би 2007-2009 онд болон 2013 онд ТЕГ-ын Сөрөх тагнуулын газрын даргын үүрэгт ажлыг нэр төртэйгээр биелүүлж ирснийг хамт ажиллаж байсан ажилтнууд гэрчилнэ.
Тагнуулын байгууллагын нэр төрд ийнхүү балмадаар халдаж, өөрийн ядмаг хийгээд өнгөц төсөөллөөр зарчим, үйл ажиллагааг нь гутааж, Монголын төр, түүний аюулгүй байдлыг хангах байгууллагын үйл ажиллагаанд санаатайгаар хохирол учруулж байгаа Б.Хурцын үйлдлийг холбогдох байгууллагууд анхааралдаа авна гэдэгт найдаж байна.
Б.Хурц нь олон хүнийг хэлмэгдүүлж, эрүүдэн шүүж, амьдралаар нь хохироогоод ханахгүй эдүгээ бусдыг дахин гүтгэн доромжилж, улс төрийн нам бараадан эрх мэдэлд хүрэхээр санаархаж буйг анхааралтай ажиглаж байгаа бөгөөд хуулийн хүрээнд бүхий л арга хэмжээг авах болно гэдгээ үүгээр мэдэгдье.
Монгол Улсын иргэн
Баяуд овогт Донровын ЦОГТБААТАР" гэжээ.
