Монгол оронд хөвчөөс баавгай бууж ирээд аюул болж байна. Баавгай бол манайдаа л хамгийн том араатан. Ганц манайд ч биш, дэлхий даяар том араатны тоонд орно. Ер нь бол музейд байгаа чихмэлийг нь харахад бяруу шиг хэмжээтэй харагддаг. Тэр чихмэл хатмал байдалтай байдгийг та бид юу эс андах вэ. Жинхэнэ баавгай тийм хэмжээтэй, дээр нь том махчин араатны сүр хүч, уур амьсгал, энерги нэмэгдэхээр ямар сүрлэг, бас аймшигтай амьтан бэ гэдгийг та өөртөө дүрсэлж чадах байх. Бараг төө хэрийн бахим хумс, эрхий хуруу шиг том соёо, түүнийгээ хөдөлгөх хүч чадал гээд. Ийм амьтны өөдөөс гар нүцгэн монголчууд уурга, бугуйлаа бариад л босож байна даа. Тэр том араатанд идүүлэх, уруулах эсэх нь Увсын орлогч дарга Аанхаагийн хэлснээр үнэхээр “цаг хугацааны” асуудал юм.

Баавгай алах хуулиар хориотой, хэрэв албал өндөр торгуультай, дээрээс нь хоригдох ялтай. Дэлхийн хэвлэлээр гар нүцгэн монголчуудыг баавгай хүлж байхыг харуулаад “эмгэнэлтэй” гэж дүгнэсэн байна лээ. Ийм болчхоод байхад төр засаг дүлгэнэж, дүлгэнэж “Баавгай дайрвал буудаж болно” хэмээн зориггүй хэлсэн. Тэрнээс өмнө мөн ч их юм боллоо. Утсаар мэдэгд ч гэх шиг,баримтжуулж ав ч гэх шиг. Нөгөө хэлсэн утас руу нь орой залгахад “Ажлын цаг дууссан байна” гэж цовоо гэгч нь хариулж ч байх шиг. Тэгж тэгж сая Засгийн газрын хуралдаанаас БОУАӨЯ-нд баавгай унтуулах буу, үргээх цацлага, зөөх тээвэрлэх унаа, шатахуун гээд нэг тэрбум төгрөг Засгийн газрын нөөцөөс гаргах болсон. Тэр дор нь “Байгаль орчин, уур амьсгалын өөрчлөлтийн яамны ТНБД Ш.Батбаяр: Нэг нь 32 сая төгрөгийн үнэтэй баавгайг унтуулах 12 бууг ХБНГУ, АНУ-аас шууд гэрээгээр худалдан авна гэж мэдэгдээд байна. Хуучин цагт бол “Нам засагтаа баярлаад ханахгүй” байгаагаа л хэлэх байв. Гэтэл юм бүхэн хөгжсөн одоо цагийн нийгэмд тэр дороо л “Амьтан унтуулах бууны хамгийн үнэтэй нь 2400 евро байна” гээд цахимаар шуугиад унав.Энэ хамгийн үнэтэйдээ 9.924.000 болох нь. Үүнээс нэг бүр нь дөрөв дахин үнэтэй буу авах аж. Сум унтуулах эмтэй тариур зэрэг нь нийлэхээрээ ийм үнэд хүрч байгаа юм гэж төр засгаа өмөөрөх үү. Болох л юм,гэхдээ монголчуудын баавгайд бариулах зовлонгоор мөнгө хийж байна гэж л хардахаар байна. Хэрэв зовлонгоор зоолоогүй л юм бол авсан бууныхаа зураг, сум тариураа бичлэгээр нь ард түмэндээ тайлан тавих хэрэгтэй байна. Үнэ өртөг нь дороо л гараад ирнэ. БОУАӨЯ-ы сайд Ц.Сандаг-Очир гэж УИХ-ын гишүүн байдаг. Нөгөө “арга билэг шиг” гэдгээр нь хүмүүс санах байх. Монголчууд баавгайд бариулах аюулд унасан биш, сайд болон түүний баг татвар төлөгчийн мөнгөнөөс хэдэн төгрөг “унагах” болоод явчихав уу гэсэн яриа нийгэмд үүсэв. Ингээд шооч ард түмэн “Сандагаа сайдын буу баавгайг биш, татвар төлөгчдийг л онилчихлоо” гэж хүртэл ярилцаж байна.

Д.Нацаг Өдрийн сонин