Л.Оюун-Эрдэнийн Засгийн газарт ажиллаж буй хэд хэдэн сайдыг солих тухай асуудал МАН-ын "том" дарга нарын хүрээнд яригджээ. Учир нь ажлаа хийж мэддэгүй, чаддаггүй хэдэн сайдын балгаас болж засгийн тэргүүний нэр хүнд шалдаа унаж, түүнийг Замын-Үүд сум руу "хүлгийн жолоо" залахад хүргэсэн.

Дээрх сайд нарын нэг нь Зам тээвэр хөгжлийн сайд Л.Халтар. Түүний балгаас болж Ерөнхий сайд Л.Оюун-Эрдэнэ Замын-Үүд суманд ажиллаж хэд хэдэн албан тушаалтныг ажлаас нь чөлөөлж, орных нь хүмүүсийг томилсон ч тэнд нь байдал дээрдэх нь бүү хэл өмнөхөөсөө улам дордож, олны хэл ам дагуулах болсон.

Энэ бүхний буруутан нь нөгөө л Л.Халтар сайд. Уг нь засгийн тэргүүн тус сум руу очиж хил, гааль дээр тагларч бөөгнөрсөн ачаа барааны асуудлыг Л.Халтарын өмнөөс шийдэхээр очсон ч дээрдүүлж чадсангүй.
Үндсэндээ Ерөнхий сайд Л.Оюун-Эрдэнэ Л.Халтар сайдын өмнөөс ажлыг нь хийх гэж очоод өөрийн болон зарим дарга нарынхаа нэр хүндийг нийгэмд навсайтал унагааж, эцэст нь олон нийт Ерөнхий сайдыг хэлсэн амандаа хүрч ажлаа сайжруулах хугацаатай үүрэг авсан хэдэн дарга нараа яаралтай огцруул хэмээн шаардах болов.
Тухайлбал, Ерөнхий сайд Замын-Үүд суманд ажиллахдаа "Ачаа барааны бөөгнөрлийг" сарын дотор шийдэхгүй бол бүгдийг нь ажлаас хална гэж хэлсэн үг нь эргээд түүнийг ороох болов.
Мэдээж Засгийн газраас үүрэг авч, томилогдон очсон дарга нар өөрсдийн хүсэлтээр албан тушаалд очоогүй учраас тэд тийм ч амархан хашиж байсан албанаасаа салахгүй гэдэг нь тодорхой.
Учир нь томилолт өвөртлөн явсан дарга нар Зам тээвэр хөгжлийн сайд Л.Халтарын "баасан баасыг" цэвэрлэж чадаагүйн төлөө өмнөөс нь хариуцлага хүлээж даргын сэнтийгээсээ буухгүй гэсэн үг.
Үнэндээ Замын-Үүдийн гацсан, бөглөрсөн, ачаа тээврийн үнэ буураагүй шалтгааны гол буруутай эзэн нь өнөө Л.Халтар сайд шүү дээ.
Гэтэл Зам тээвэр хөгжлийн сайдын хийх ёстой ажлыг засгийн тэргүүн маань хаа, хамаагүй дарга нарт хамаатуулан өгч, тэднийг нийгэмд адлуулж буй нь Л.Халтар сайдыг уснаас хуурай гаргахыг оролдож, мөрөөрөө ажлаа хийж байсан хэдэн дарга нарын нэр хүндийг шавар шалбаагтай хутгасан нь харамсалтай.
Тиймээс энэ бүхний буруутан хэн байв гэдгийг одоо л нэг МАН-ын том дарга нар ухаарч Л.Халтар сайдтай хариуцлага ярьж, түүнийг албан тушаалаас нь огцруулахаас аргагүй байдалд оржээ. Тэр ч утгаараа "хэргийн эзэн хэнгэргийн дохиур" Л.Халтар сайдыг сэнтийгээс нь буулгахаар санал нэгдсэн аж.Магадгүй засгийн тэргүүн Л.Халтар сайдыг танхимдаа байлгавал өөрөө ч өнхөрөх аюултай тул түүнийг баяртай хэмээж танхимаасаа явуулахаар шийдсэн нь хамгийн зөв алхам болох биз ээ

Эх сурвалж: Erennews.mn