Зам тээврийн хөгжлийн сайд гэх албанд томилогдсон Л.Халтарын зөрүүтэй үг, үйлдлээс бол энэ салбар өөдлөхөөсөө өнгөрөх нь бололтой.

Энэ удаа түүний гарын үсэг бүхий гэрээ ил болсон нь олон нийтийг бухимдуулж байна. Тодруулбал, энэ оны гуравдугаар сарын 31 гэсэн бичиглэл бүхий ЭКО ЖИШИГ ТЭЭВРИЙН ХАМТРАН АЖИЛЛАХ ГЭРЭЭнд Зам тээврийн хөгжлийн сайд Л.Халтар маргааш нь буюу дөрөвдүгээр сарын 1-нд гарын үсэг зуржээ.

Ингэхдээ энэ гэрээний дагуу “Баян зам тээвэрчдийн холбоо” ТББ Цогтцэций-Чойр чиглэлийн улсын чанартай замд хяналт тавих аж. Түүнчлэн гэрээг Авто замын тухай хуулийн 22.1 дэх хэсэг болон Зам тээврийн хөгжлийн сайд 2019 оны 134 дугаартай тушаалыг үндэслэн байгуулж буйгаа тусгажээ.

Тэгвэл Авто замын тухай хуулийн 22.1-т “Авто замыг эзэмшигч нь авто замын арчлалт, засварын ажлыг мэргэжлийн удирдлага, арга зүйгээр хангаж, хяналт тавьж ажиллана” гэж заасан байдаг. Харин Зам тээврийн хөгжлийн сайд 2019 онд 134 дугаартай тушаал гаргаагүй бөгөөд 2017 онд дээрх дугаар бүхий тушаал гаргасан байдаг. Гэхдээ тэр нь Зам, тээврийн салбарын шагнал олгох журам гэх нэртэй.

Тэгэхээр гэрээнд гарын үсэг зурсан Л.Халтар сайд чухам ямар тушаалын дагуу гэрээ байгуулсан хэрэг вэ. “Баян зам тээвэрчдийн холбоо”-ны хувьд тээвэрлэлт, жолооч нарын асуудлыг байнга хөндөж байдаг гэдгийг олон нийт сайн мэддэг болсон.

Гэхдээ тэд улсын чанартай замд хяналт тавьж ажиллах бүрэлдэхүүнтэй төрийн бус байгууллага биш. Тодруулбал, төрийн зарим чиг үүргийг гэрээний үндсэн дээр төрийн бус байгууллагаар гүйцэтгүүлэх тухай заагдсан тогтоолууд байдаг. Гэхдээ мэргэжлийн бус байгууллагаар улсын чанартай замд хяналт тавиулна гэдэг нь өөрөө ихээхэн анхаарал татах хэрэг.

Товчхондоо бол дээр дурдагдаад байгаа улсын чанартай замаар Өмнөговь аймагт үйл ажиллагаа явуулж буй “Эрдэнэс таван толгой”, “Таван толгой”, “Энержи ресурс” зэрэг компанийн тээвэрлэлт хийгдэнэ. Гэтэл түүгээр зорчих тээвэрлэлт явуулах жолооч нарыг бүх эрхийг Л.Халтар сайд “Баян зам тээвэрчдийн холбоо” ТББ-д өгчихсөн байгаа юм.

Уг нь гэрээнд заасан QR код олгох зэрэг заагдсан бүхий л ажлыг Авто тээврийн үндэсний төв гэх том байгууллага хариуцан ажиллах чиг үүрэгтэй. Хийсээр ч ирсэн. Үнэхээр төрийн бус байгууллагад өгөх гээд байгаа бол мэргэжлийн багт өгч болох байсан.

Харамсалтай нь Л.Халтар сайд тэгсэнгүй. Хаяа мань сайдыг гөвчхөөд байдаг төрийн бус байгууллагаас айхдаа дээрх гэрээг хийчихсэн бололтой.

Товчхондоо Л.Халтар сайдад зам тээврийн хөгжлөөс илүү өөрийнх нь нэр хүнд, нүүрний арьс л чухал байдаг гэдгийг байгуулсан гэрээнээс нь бэлхнээ харж болохоор байна. Хэдийгээр түүнийг салбарын мэргэжилтэн гэж үнэлдэг ч мань хүн сайдын хэмжээнд хүрч ажиллах менежер биш гэдгээ алхам тутамдаа харуулж байна. Тэр зам тээврийн салбар дундаа зөвхөн төмөр замын л мэргэжилтэн юм байна.