Монгол Улсын Их Хурлын дарга Г.Занданшатар 2021 оны 54 дүгээр захирамжаараа Нийтийн мэдээллийн тухай, Хүний хувийн мэдээлэл хамгаалах тухай, Кибер аюулгүй байдлын тухай, Цахим гарын үсгийн тухай хуулийн шинэчилсэн найруулгын төсөл болон эдгээр хуулийн төсөлтэй хамт өргөн мэдүүлсэн бусад хуулийн төслүүдийг хэлэлцүүлэгт бэлтгэх үүрэг бүхий ажлын хэсгийг 9 гишүүний бүрэлдэхүүнтэйгээр байгуулсан билээ.
УИХ-ын гишүүн, Инновац, цахим бодлогын байнгын хорооны дарга, ажлын хэсгийн ахлагч Н.Учрал болон УИХ-ын гишүүн Д.Цогтбаатар, Ж.Сүхбаатар, Э.Бат-Амгалан, Б.Саранчимэг, П.Анужин нар Харилцаа холбоо, мэдээллийн технологийн газар болон Улсын Бүртгэлийн Ерөнхий газруудад ажиллаж, үйл ажиллагаатай нь танилцан, хуулийн төслүүдтэй холбоотой асуудлаар санал солилцон ярилцлаа.
Харилцаа холбоо, мэдээллийн технологийн газраас “e-Mongolia” төрийн үйлчилгээний нэгдсэн цахим системийг хөгжүүлж байгаа бөгөөд өдөрт дунджаар 50-60 мянган хандалт авдаг байна. Иргэд вакцины гэрчилгээ, нийгмийн даатгалын шимтгэл төлөлтийн талаарх тодорхойлолт, оршин суугаа хаягийн лавлагаа зэрэг төрийн 539 төрлийн үйлчилгээг одоогийн байдлаар вебсайтаар дамжуулан авах боломжтой болжээ.
“Е-Mongolia” нь цахим засаглалын нэг хэсэг гэдгийг Харилцаа холбоо, мэдээллийн технологийн газрын дарга Б.Болор-Эрдэнэ танилцуулгынхаа үеэр онцолж байв. Тэрбээр “Зөвхөн харилцаа холбоо, мэдээллийн технологийн салбар эсвэл төрийн үйлчилгээг цахимжуулаад орхихгүй. Техник технологийн хурдацтай хөгжлийн үед Засгийн газраас “Цахим үндэстэн” болох зорилт тавин ажиллаж байна. “Цахим үндэстэн” болохын тулд бүх нийтийн цахим хэрэглээний суурь чадавхыг сайжруулах, ур чадвартай мэргэжилтэн бэлтгэх, цахим орчны зохистой хэрэглээг төлөвшүүлэх, хөгжлийн бэрхшээлтэй иргэдийн мэдээлэл авах эрхийг хангах, мэдээллийн хүртээмжийг нэмэгдүүлэх зэрэг олон ажлыг хийх шаардлагатай. Цахим шилжилтийг хийхэд төр, хувийн хэвшлийн хамтын ажиллагаа, иргэдийн оролцоо, хууль эрх зүйн орчныг бүрдүүлэх нь чухал ач холбогдолтой” гэлээ.
УИХ-ын гишүүн, Инновац, цахим бодлогын байнгын хорооны дарга, ажлын хэсгийн ахлагч Н.Учрал “Төрийн үйл ажиллагааг ил тод, авлигаас ангид, иргэдэд чирэгдэлгүй хүргэхэд цахим шилжилт чухал үүрэг гүйцэтгэнэ. Манай улс дэлхийн бусад улс оронтой өрсөлдөх чадвараа дээшлүүлэх шаардлага үүсэж байна. Технологийн шинэчлэлээс гадна хууль, эрх зүйн өөрчлөлтийг хийх хэрэгтэй учраас УИХ-ын Инновац, цахим бодлогын байнгын хороо, Хууль зүйн байнгын хороо, Аюулгүй байдал, гадаад бодлогын байнгын хороо хамтран Нийтийн мэдээллийн тухай, Хүний хувийн мэдээлэл хамгаалах тухай, Кибер аюулгүй байдлын тухай болон Цахим гарын үсгийн тухай хуулийн төслүүд дээр ажиллаж байна. Цахим засаглалыг хөгжүүлэхэд мэдээллийн аюулгүй байдал хамгийн чухал байгаа. Ер нь дэлхий нийтийн хөгжил өөрөө цахим технологи руу чиглэж, түүнээс хамаарах хамаарал дэндүү их болж байна. Цахим технологийг бид зөвхөн бизнесийн хэрэглүүр гэж харах нь буруу. Энэ нь өөрөө хөгжлийн, эдийн засгийн маш том, чухал элемент болж хөгжиж байна. 21 дүгээр зуун бол Мэдээллийн эрин зуун гэж бид даруй 20 жилийн өмнөөс л ярьсан шүү дээ. Тэгэхээр ирэх 100 жилийн Монгол улсын хөгжлийг тодорхойлох, эдийн засгийг солонгоруулах чухал салбарын, суурь хуулиудыг боловсруулж байна гэж ойлгож болно” гэлээ.
Улсын Их Хурлын гишүүд үргэлжлүүлэн Улсын бүртгэлийн ерөнхий газарт ажиллан иргэн, хуулийн этгээд, эд хөрөнгийн эрхийн улсын бүртгэлийн өгөгдлийн сан, мэдээллийн нэгдсэн сүлжээ, мэдээллийн технологийн тусгай тоног төхөөрөмж, зориулалтын орчин бүхий серверийн өрөө, иргэний үнэмлэх, гадаад паспортын тоног төхөөрөмжийн үйл ажиллагаа болон Улсын бүртгэлийн байгууллагын цахим үйлчилгээний танхим, нэгдсэн архивын үйл ажиллагаануудтай тус тус танилцав.
Улсын бүртгэлийн ерөнхий газрын дарга Д.Дэлгэрсайхан байгууллагынхаа цахим үйл ажиллагааны талаар Улсын Их Хурлын гишүүдэд танилцуулж, Нийтийн мэдээллийн тухай, Хүний хувийн мэдээлэл хамгаалах тухай, Кибер аюулгүй байдлын тухай, Цахим гарын үсгийн тухай хуулийн шинэчилсэн найруулгын төсөл болон хамт өргөн мэдүүлсэн бусад хуулийн төслийн талаар санал солилцлоо.
эх сурвалж: tovch.mn
